"სტუდენტები აუდიტორიიდან ქუჩებში გადიან" — ამ ლოზუნგით უკვე მეორე დღეა ილიაუნის A კორპუსის წინ ლექტორები საჯარო ლექციებს მართავენ. საჯარო ლექციის მთავარი თემა ცენზურა და პროტესტია.

დღეს საჯარო ლექციების სერიაში მონაწილეობა მიიღო: ლაშა ბუღაძემ, ნენე კვინიკაძემ, ქეთი დევდარიანმა და დათა თავაძემ.

"საჯარო ლექციები არის პროტესტის ერთგვარი ფორმა, რადგან არ გვცილდება, რომ განვაგრძოთ ჩვენი მუშაობა ნორმალურ აკადემიური რუტინით, რაშიც ვიყავით მოქცეულები. გადავწყვიტეთ, გამოვიტანოთ გარეთ საჯარო ლექციების ციკლი. საჯარო ლექციების ციკლი არ არის რომელიმე კონკრეტული ჯგუფისთვის. აქ უკვე ბავშვების გაერთიანება ხდება, იდეების გაცვლა-გამოცვლა", — ამბობს ილიას სახელმწიფო უნივერსიტეტის წარმომადგენელი.

საჯარო ლექციების პარალელურად, ცოტა ხნის წინ თბილისის სახელმწიფო უნივერსიტეტის, პირველი კორპუსის ეზოში კარავი გაშალეს. მათი თქმით, დღეიდან პროტესტი თსუ-ს ეზოშიც გაგრძელდება. თსუ-ს სტუდენტების ნაწილი უნივერსიტეტის რექტორის ჯაბა სამუშიას გადადგომას ითხოვს.

თბილისის უნივერსიტეტებთან ერთად, პროტესტი ბათუმშიც გრძელდება. ბსუ-ს სტუდენტები რამდენიმე წუთის წინ უნივერსიტეტის რექტორს, მერაბ ხალვაშს შეხვდნენ.

"შევხვდით ბათუმის სახელმწიფო უნივერსიტეტის რექტორს, ბატონ მერაბ ხალვაშს.

მოვითხოვეთ გააკეთოს განცხადება უნივერსიტეტმა, დაგმოს თბილისის სახელმწიფო უნივერსიტეტში მომხდარი ფაქტი და თქვას, რომ უნივერსიტეტი არ არის სპეც დანიშნულების რაზმების ადგილი და უნივერსიტეტი არის სტუდენტების. მივეცით ვადა დღის ბოლომდე, წინააღმდეგ შემთხვევაში მივმართავთ პროტესტის სხვა ფორმებს!!!"