ეკონომიკის მინისტრი, ნათია თურნავა აცხადებეს, რომ მნიშვნელობა არ აქვს Wizz Air თვითმფრინავებს ქუთაისის აეროპორტში დააყენებს, თუ რომელიმე თავის ბაზაზე გადაიყვანს. ამასთან, თურნავა ამბობს, რომ კომპანია ბაზრიდან გასვლას არ აპირებს.

30 ივნისს მედიაში გავრცელდა ინფორმაცია, რომ ავიაკომპანია ქვეყანაში ბაზას ხურავდა, თუმცა ოფიციალური განცხადება ამასთან დაკავშირებით არ გავრცელებულა. ბაზის დახურვა არ ნიშნავს ბაზრიდან გასვლას.

"ახლახან პირადად ვესაუბრე კომპანიას და Wizz Air თავადაც დაადასტურებს საჯაროდ, რომ არსად არ გადის, აგრძელებს საქართველოს ხელისუფლებასთან და საქართველოსთან თანამშრომლობას, ერთგული რჩება თავისი მომხმარებლების, ჩვენი მოქალაქეების", — განაცხადა ნათია თურნავამ.

მან აღნიშნა, რომ დღეს ავიაციის გლობალური ინდუსტრია საკმაოდ დიდი სირთულეების წინაშეა და ნებისმიერი ავიაკომპანია ცდილობს შეამციროს დანახარჯები, აკეთებს სხვადასხვა თვითმფრინავის გადაჯგუფებას, რეალოკაციას, რაც არის ტექნიკური საკითხი. თურნავა აღნიშნავს, რომ არანაირი მნიშვნელობა არ აქვს, Wizz Air-ს თვითმფრინავი ქუთაისის აეროპორტში ეყოლება დაყენებული, თუ რომელიმე თავის ბაზაზე გადაიყვანს.

"მთავრია, რომ Wizz Air არსად გადის. კომპანიის განაცხადი შემოსულია ოფიციალურად ფრენების აღდგენასთან დაკავშირებით და ელოდება ჩვენს შეტყობინებას. რა მომენტშიც ვიქნებით მზად და ჩავთვლით შესაძლებლად, რომ უსაფრთხოების ყველა ზომის დაცვით გარკვეული მიმართულებები უნდა გააქტიურდეს, Wizz Air გააგრძელებს ფრენებს და ამას თავად კომპანია უახლოეს ხანებში დაადასტურებს", — აღნიშნა ნათია თურნავამ.