Wizz Air-ის კორპორატიული კომუნიკაციების მენეჯერის, ანდრაშ რადოს ინფორმაციით, ქუთაისის აეროპორტის ბაზაზე დროებით ჩერდება ოპერირება და არ იხურება.

"ჩვენ არ ვხურავთ ბაზას, ჩვენ არ გვაქ რაიმე გეგმა ამასთან დაკავშირებით, სამწუხაროდ, ვაჩერებთ ბაზის ოპერაციებს, თვითმფრინავები სხვა ბაზაზე გადავიყვანეთ".

ონლაინ პრესკონფერენციაზე მან განმარტა, რომ საქართველოში დასაქმებულების გათავისუფლება არ იგეგმება და მათთვის გამოსავლის პოვნას ცდილობენ.

"ჩვენ ქუთაისის ბაზის თანამშრომლებს ვთავაზობთ საზღვარგარეთ, ვიზეარის სხვა ბაზაზე მუშაობას მანამ, სანამ განვაახლებთ ოპერირებას. არავის გათავისუფლებას არ ვაპირებთ", — თქვა მან.

ანდრაშ რადომ, ასევე უპასუხა კითხვას, თუ რა იგეგმება აგვისტოში. მან თქვა, რომ კონკრეტული პასუხი არ აქვთ ფრენების აღდგენის თარიღზე, რადგან ელოდებიან მთავრობების გადაწყვეტილებებს. მანვე განაცხადა, რომ ფრენების განახლების თარიღზე ინფორმაციას გაავრცელებენ.