გიორგი შაქარაშვილის ბიძა ადვოკატი მირიან ნიკოლაძე ამბობს, რომ პარტია ჩვენი საქართველო-სოლიდარობის ალიანსის ერთ-ერთი დამფუძნებელი და პოლიტიკური საბჭოს წევრია. ამის შესახებ მან დღეს, 12 ივლისს, პარტიის ცენტრალური ოფისის გახსნისას განაცხადა. პარტია ქართული ოცნებიდან წასულმა დეპუტატებმა: მარიამ ჯაშმა, ბექა ნაცვლიშვილმა, გედევან ფოფხაძემ და ლევან გოგიჩაიშვილმა დააფუძნეს.

ბექა ნაცვლიშვილის თქმით, ნიკოლაძე მათ პარტიას თვენახევრის წინ, გიორგი შაქარაშვილის ტრაგედიამდე გაცილებით ადრე, შეუერთდა.

როგორც ნიკოლაძე ამბობს, ის 2004 წლიდან ნაციონალურ მოძრაობის მოწინააღმდეგეთა რიგებში იყო და ქართულ ოცნებას მხარს უჭერდა. თუმცა, ახლა აცხადებს, რომ ქართული ოცნება ნაციონალურ მოძრაობასთან ერთად უნდა წავიდეს.

"ჩემი უახლესი მეგობრები არიან ის პარლამენტის წევრები, რომლებიც ამ პარტიის დამფუძნებლები არიან. მეც თანადამფუძნებელი ვარ და ბუნებრივია პოლიტსაბჭოს წევრიც გახლავარ. 2004 წელს ჩემი ნებით წამოვედი პროკურატურიდან, რადგან იმ სადისტური რეჟიმის პირობებში არ ვიმუშავებდი. 9 წელი ფაქტიურად ქუჩაში ვიყავი, იმის მიუხედავად რომ მოქმედი ადვოკატი ვიყავი, მაგრამ ყველგან ვიბლოკებოდი როგორც ხდებოდა. ამის შემდეგ ქართული ოცნების მხარდამჭერი ვიყავი, რადგან ის ხელისუფლება უნდა წათრეულიყო. პრინციპულია ჩემთვის რომ მარტო ქართულმა ოცნებამ კი არ უნდა დატოვოს, ქართული ოცნება რომელიც ამდენი ხანია ხელს აფასებს ამ ნაციონალების ნახირს, აი, იმასთან ერთად უნდა წავიდეს ხელისუფლებიდან", — განუცხადა მთავარ არხს მირიან ნიკოლაძემ.