სქროლის გუნდმა, სკუტერის უსაფრთხო მართვის შესახებ რეკომენდაციების კიდევ უფრო მეტი პოპულარიზაციისთვის, გადაწყვიტა, წამოეწყოთ კამპანია, რომლის ფარგლებში "სქროლის მართვის აკადემია" ატარებს ტრენინგების სერიას სკუტერის მართვისა და უსაფრთხოების წესების შესასწავლად, სადაც მონაწილეები საჩუქრად დაცული მგზავრობის ყველაზე მნიშვნელოვან ატრიბუტს — ჩაფხუტს მიიღებენ.

"ჩვენთვის, სქროლის გუნდისთვის, ჩვენი მგზავრების უსაფრთხოება უმთავრესი პრიორიტეტია, ამიტომ მაქსიმალურად ვცდილობთ, სკუტერის უსაფრთხო მართვის შესახებ რეკომენდაციები ყველასთვის ხელმისაწვდომი იყოს", — აცხადებენ კომპანიაში.

სკუტერის მართვა მარტივი და სახალისოა, თუმცა, ამის მიუხედავად, ქალაქში არსებობს სხვადასხვა დაბრკოლება, რომელმაც შესაძლოა ახალბედა სქროლერი შეაფერხოს, იქნება ეს ქვეითები, ავტომობილები, თუ გზის წინაღობები. "სქროლის მართვის აკადემიის" ღონისძიების ფარგლებში აკადემიის ტრენერები მონაწილეებს სკუტერის მართვას ასწავლიან ისეთ უსაფრთხო გარემოში, სადაც სატესტო გასქროლვა დამწყებებს გაცილებით გაუმარტივდებათ. ასევე, აუხსნიან იმ ფუნდამენტურ წესებს, რაც უნდა გაითვალისწინონ მგზავრობის დროს, რათა იმგზავრონ კომფორტულად და უსაფრთხოდ.

"მართალია უსაფრთხოების წესებს ონლაინ სივრცის საშუალებით აქტიურად ვავრცელებთ, მაგრამ ვფიქრობთ, რომ სრულიად ახალი სატრანსპორტო საშუალების კარგად ასათვისებლად თეორიულ გაკვეთილებთან ერთად, პრაქტიკული გამოცდილებაც საჭიროა", — გვიყვებიან სქროლში.

ასევე, სქროლის მართვა, უსაფრთხოების სტანდარტებიდან გამომდინარე, მხოლოდ სრულწლოვანებისთვისაა ნებადართული, ამიტომაც ამ უსაფრთხოების წესის დარღვევების მინიმუმამდე შესამცირებლად, ბანკებთან თანამშრომლობის ფარგლებში აპლიკაციაში აკრძალულია სასკოლო ბარათების გამოყენება და სამუდამოდ იბლოკება ის ანგარიში, რომლის გამოყენებაშიც არასრულწლოვანი იქნება შემჩნეული.

აღსანიშნავია ის ფაქტიც, რომ აპლიკაცია მომხმარებლებს თავადაც აძლევს მითითებებს და უხსნის წესებს, რომელთა დაცვაც უსაფრთხო მგზავრობაში დაგვეხმარება. უსაფრთხო გადაადგილების მიზნით, აპლიკაციაში არსებობს ზონები, სადაც გადაადგილების სიჩქარე შეზღუდულია, მაგალითად: ისეთ ხალხმრავალ ადგილებში, როგორიცაა პარკები და სკვერები ვერ გასქროლავ მაღალი სიჩქარით, რადგან შესაძლებელია ამით საფრთხე შეუქმნა სხვებსაც და საკუთარ თავსაც. სწორედ ამიტომ, ასეთ ტერიტორიებზე შესვლისას, შენივე და სხვისი უსაფრთხოებისთვის, სქროლის გადაადგილების სიჩქარე იკლებს. აპლიკაციაში ასევე მონიშნულია ზონები, სადაც სკუტერის გაჩერება არ შეიძლება.

გარდა ამისა, კომპანია სქროლმა და ფონდმა პარტნიორობა საგზაო უსაფრთხოებისთვის ურთიერთთანამშრომლობის მემორანდუმს მოაწერა ხელი, რომლის მიზანიცა ეკომეგობრული ტრანსპორტის პოპულარიზაცია, ამ მიმართულებით საზოგადოებაში ცოდნისა და ცნობიერების დონის ამაღლება და ქვეყანაში უსაფრთხოების მხრივ არსებული მდგომარეობის გაუმჯობესების ხელშეწყობა.

წესები უსაფრთხო მგზავრობისთვის:

  • სკუტერზე დადექი მარტო
  • მართვა ნებადართულია 18 წლიდან
  • რეკომენდებულია ატარო ჩაფხუტი
  • არ გაიკეთო ყურსასმენები
  • ატარე ორივე ხელით
  • იყავი ფხიზელი
  • დაიცავი საგზაო მოძრაობის წესები
  • სამანქანო გზაზე სქროლვის დროს სკუტერი მოძრაობის მიმართულებით, სავალი გზის უკიდურეს მარჯვენა მხარეს ატარე