გასულ წელს გამოსულ HBO-ს სერიალში Euphoria მოდელმა, მომღერალმა და მსახიობმა ზენდეიამ თავისი შესრულებით უამრავი მაყურებელი მოხიბლა და თავის გულშემატკივრებს კიდევ უფრო შეაყვარა თავი.

სწორედ ამის გამო, როგორც ჩანს, მან გადაწყვიტა, რომ სრულიად განსხვავებულ პროექტზე კვლავ ეთანამშრომლა ამ შოუს შემოქმედთან და ჩვენთვის ახალი დამაინტრიგებელი სანახაობა შემოეთავაზებინა.

სულ ცოტა ხნის წინ გახდა ცნობილი, რომ Euphoria-ს რეჟისორმა და სცენარისტმა, სემ ლევინსონმა 17 ივნისიდან 2 ივლისამდე პერიოდში კალიფორნიის შტატში სახლი იქირავა და საიდუმლოდ ახალი ფილმი გადაიღო. ფილმის შესახებ ინფორმაცია პირველად გუშინ გავრცელდა და ის წინასწარ დაანონსებული არ იყო.

სემ ლევინსონი და ზენდაია.

ფოტო: Getty / Monica Schipper

იმის გამო, რომ აშშ-ში კორონავირუსის გავრცელების კვლავ საკმაოდ მაღალი მაჩვენებელია, გადაღებები მკაცრად განსაზღვრული უსაფრთხოების ზომების დაცვით მიმდინარეობდა: გადამღები ჯგუფისა და სამსახიობო გუნდის წევრები ორი კვირის განმავლობაში ერთ სივრცეში იყვნენ და მათ არ შეეძლოთ გადასაღები მოედანი დაეტოვებინათ.

როგორც ამერიკული გამოცემა Deadline წერს, მომავალი ფილმის სახელწოდება Malcolm & Marie-ია და ის თემატიკით ნეტფლიქსის გასული წლის გახმაურებულ ფილმ Marriage Story-ის ჰგავს, ამავდროულად კი მასში დღეს აქტუალური სოციალური თემებია წამოჭრილი.

აღსანიშნავია, რომ სემ ლევინსონის ამ საიდუმლო პროექტში ზენდეიასთან ერთად ჯონ დევიდ ვაშინგტონიც მონაწილეობდა, რომელიც ასევე თამაშობს კრისტოფერ ნოლანის ახალ კინოსურათში Tenet.

ამ ინფორმაციის გავრცელებიდან მალევე ზენდეიამ ინსტაგრამზე ფილმიდან პირველი კადრი გამოაქვეყნა.

View this post on Instagram

Malcolm & Marie

A post shared by Zendaya (@zendaya) on

ჯერჯერობით ფილმის შესახებ სხვა დეტალები კვლავაც უცნობია, თუმცა რაც ამჟამად ვიცით, საფუძვლიანი ეჭვს გვიჩენს, რომ წინ საინტერესო სანახაობა გველოდება: ჰოლივუდის კაშკაშა მსახიობების მონაწილეობით გადაღებული საიდუმლო ფილმი, რომელიც კარანტინის პირობებში ერთ სივრცეში შეიქმნა.