დღეს, 9 ივლისს საქართველოში პირველი Drive-in კინოთეატრი კავეა Drive-in სინემა ლისის ახალ იპოდრომზე გაიხსნება. მაყურებელი დიდ ეკრანზე ქართული ფილმის უარყოფითი რიცხვების პრემიერას დაესწრება და ერეკლე დეისაძის და მისი ბენდის მონაწილეობით საქართველოში პირველ Drive-in კონცერტს მოისმენს. კავეა Drive-in ლისის ბილეთების შეძენა ონლაინ არის შესაძლებელი.

"დაიდო თუ არა, რამდენიმე საათში გახსნის არცერთი ბილეთი აღარ იყო დარჩენილი და ბევრი მაყურებელი გვწერდა, რომ ვერ მოასწრეს ბილეთების შეძენა. სწორედ ასეთმა მოთხოვნამ გადაგვაწყვეტინა, რომ კიდევ ერთი დღით დაგვემატებინა Drive-in კონცერტი ერეკლე დეისაძის და მისი ბენდის მონაწილეობით. ასე რომ, მაყურებელს აქვს შესაძლებლობა, შეიძინოს 10 ივლისის ბილეთები, დაესწროს კონცერტს და ნახოს უტა ბერიას უარყოფითი რიცხვები", — აცხადებენ კავეას წარმომადგენლები.

ფოტო: Cavea

კავეას ქსელი ავტომობილების პირველ კინოთეატრში მაყურებელს უახლეს რეპერტუართან და მსოფლიო პრემიერებთან ერთად, კინომარათონებს და სხვა ღონისძიებებს შესთავაზებს. კავეა drive-in ლისი 100 ავტომობილზეა გათვლილი და ყოველ საღამოს 21:00 და 23:00 საათზე მაყურებელს შესაძლებლობა ექნება, ფილმებს საკუთარი ავტომობილებიდან უყურონ. უტა ბერიას ფილმის უარყოფითი რიცხვების პრემიერა, კინოთეატრებში პანდემიამდე პერიოდში იყო დაგეგმილი და ახალი კინოთეატრიც სწორედ ამ ნამუშევრით იხსნება.

კავეა Drive-in ლისზე მოსული მაყურებელი, კონცერტის და ფილმის ხმას საკუთარ ავტომობილებში, რადიომიმღების მეშვეობით მოისმენს. drive-in ტერიტორიაზე შემოსვლის შემდეგ, რადიომიმღები უნდა მომართოთ ტალღაზე 95.9. ეს არის ამერიკული პრაქტიკა, რომელსაც ქართველი მაყურებელი დღეს, პირველად გამოცდის.

ბილეთების ღირებულება კი ასე განისაზღვრა, ჯიპებისთვის 39 ლარი, ხოლო სედანისთვის 29 ლარი და ავტომობილში მგზავრთა რაოდენობა კინოთეატრის ადმინისტრაციის მიერ არ იზღუდება, რაც ნიშნავს რომ 29 ლარად თავისუფლად არის შესაძლებელი კავეა Drive-in ლისზე ფილმს ოთხმა ადამიანმა უყუროს ერთი ავტომობილიდან, რაც, როგორც კომპანიაში აცხადებენ, სტანდარტული კინოს ბილეთის ფასზე მნიშვნელოვნად დაბალია.

კავეა Drive-in ლისის ტერიტორიაზე დაცულია უსაფრთხოების რეკომენდაციები, ინტერაქცია მომხმარებელსა და პერსონალს შორის მინიმუმამდეა დაყვანილი, ასევე დაცულია სოციალური დისტანცია და გათვალისწინებულია ყველა მნიშვნელოვანი მსოფლიო გამოცდილება.

ასევე იხილეთ: