როგორც ცნობილი გახდა, მუშაობა მიმდინარეობს Constantine-ს ახალ ფილმზე ჯეი ჯეი აბრამსის თაოსნობით. DC Comics-ის ცნობილი პერსონაჟი დიდ ეკრანებზე უკვე გამოჩნდა 2005 წლის Constantine-ში, რომელშიც ოკულტისტი დეტექტივის როლს კიანუ რივზი ასრულებდა.

NBC-მ მოგვიანებით შექმნა Constantine-ს სერიალი მეტ რაიანის მონაწილეობით, თუმცა ის ერთი სეზონის შემდეგ შეწყდა. მიუხედავად ამისა, რაიანმა პერსონაჟის განსახიერება CW-ს Arrowverse-ში გააგრძელა, სადაც ჯერ Arrow-ში გამოჩნდა, მოგვიანებით კი დროებითი პერსონაჟის სახით შეუერთდა Legends of Tomorrow-ს მესამე სეზონს და გუნდის მუდმივი წევრის სახით — მე-4 სეზონს. მან აგრეთვე გაახმოვანა კონსტანტინის პერსონაჟი DC-ს რამდენიმე ანიმაციურ პროექტში, მათგან უახლესი კი Justice League Dark: Apokolips War არის.

ამჟამად DC-ს არაერთ პროექტზე მიმდინარეობს მუშაობა, როგორც DC Extended Universe-ში, ისე მის ფარგლებს გარეთ. მეტიც, DC-ს, როგორც ჩანს, უფრო მეტი მიმდინარე პროექტი აქვს, ვიდრე მის მთავარ კონკურენტ Marvel-ს. DCEU-ს უამრავი მოსალოდნელი ფილმის (მათ შორის მეტ რივზის The Batman-ის და ჯეიმზ განის The Suicide Squad-ის) გარდა, CW-ზე Arrowverse აგრძელებს გაფართოებას და 2021-ში Superman & Lois-ის შოუს ვიხილავთ. ამასთანავე DC-ს კარგი პლაცდარმი აქვს DC Universe-სა და HBO Max-ის სახით — ორი სტრიმინგ სერვისის, რომლებიც ერთგულ ფანებს ემსახურება.

The Direct-ის ცნობით, Warner Bros. მუშაობს Constantine-ს ახალ სრულმეტრაჟიან ფილმზე, რომლის პროდიუსერიც აბრამსი იქნება თავის კომპანია Bad Robot-თან ერთად. ჯერჯერობით უცნობია, დაუბრუნდება როლს კიანუ რივზი თუ ახალი ფილმი სრული რიბუთი იქნება.

მართალია, The Direct შედარებით ახალი საიტია და, შესაბამისად, მისი სანდოობა ბოლომდე აშკარა არ არის, მაგრამ მაინც უნდა აღინიშნოს, რომ ასეთი ინფორმაცია ლოგიკურია, თუკი გავითვალისწინებთ აბრამსის სხვა მიმდინარე პროექტებს. WarnerMedia-სთან შეთანხმებით აბრამსი ქმნის Justice League Dark-ის სატელევიზიო სერიალს. The Direct აცხადებს, რომ ამ ახალ Constantine-ს ექნება Justice League Dark-ისთვის დამახასიათებელი ტონი და სტილი, რაც მათ შემდგომ კავშირზე შეიძლება მიანიშნებდეს. სხვა თუ არაფერი, ჯონ კონსტანტინი Justice League Dark-ის გუნდის საკვანძო წევრია, რომელიც სპეციალიზდება უფრო ბნელ, მისტიკურ საფრთხეებში.

და მაინც, გავიმეორებთ: ეს ჯერ არ ნიშნავს იმას, რომ ახალ Constantine-ზე მუშაობა უკვე დადასტურებულია, თუმცა უფრო სავარაუდოა, რომ ეს ასე იყო. შესაძლოა, უფრო კონკრეტული ინფორმაცია მივიღოთ DC FanDome-ზე, ფანების ვირტუალურ ღონისძიებაზე, აგვისტოში. ამ კონვენციას მოყვება ბევრი დიდი სიახლე DC-ს სამომავლო პროექტების შესახებ და ის მშვენიერი ადგილია ახალი ფილმის დასაანონსებლად. ცხადია, ყოველივე ეს სპეკულაციაა; დიდი ალბათობით, Warner Bros. ოფიციალურად დააანონსებს Constantine-ს, როცა ამის დრო მოვა.