თბილისის მერიის ინფორმაციით, დავით ნარმანიამ ეკოლოგიისა და გამწვანების სამსახურს დაავადებული და გამხმარი ხეების მოჭრის დავალება მისცა. მერის თქმით, ხეები ზამთრის განმავლობაში უნდა მოიჭრას, რადგან გაზაფხულზე დაავადება აქტიურდება.

ნარმანიას დავალებას გამოეხმაურა ეკოლოგიისა და გამწვანების სამსახურის უფროსი, ნინო სულხანიშვილი. მისი თქმით, თბილისის მერიის ეკოლოგიისა და გამწვანების სამსახურმა მეცნიერებისგანაც მიიღო წერილი, სადაც ისინი ხაზს უსვამენ აღნიშნულ პრობლემას ქალაქში.

თბილისის მერმა ასევე აღნიშნა, რომ 2016 წლის საშემოდგომო გამწვანების სეზონზე, საშემოდგომო რგვების ფარგლებში, 80 ათასამდე ხე დაირგო.

ნარმანიას თქმით, ხეები დაირგო მახათას მთაზე მდებარე ივერიის ღვთისმშობლის ტაძრის მიმდებარე ტერიტორიაზე, ხოლო ზეთისხილის ბაღები გაშენდა თბილისის ზღვისა და ოლიმპიური სოფლის მიმდებარედ.

"ამ სეზონზე აქცენტი ავიღეთ მაღალი ხეების დარგვაზე. მდინარე ვერეს სანაპიროსთან გაშენებული ხეივნის ხმობასთან დაკავშირებით დიდი აჟიოტაჟი რომ იყო ატეხილი, აქ გახარების მაღალი მაჩვენებელია. გაზაფხულზე დარგული ხე-მცენარეების 88%-მა გაიხარა" - განაცხადა დავით ნარმანიამ მთავრობის სხდომაზე.