ოკუპირებულ ტერიტორიაზე მცხოვრები აბიტურიენტები ქვეყნის უმაღლეს სასაწავლებლებში ერთიანი ეროვნული და საერთო სამაგისტრო გამოცდების გარეშე ჩაირიცხებიან და სწავლის საფასური სასწავლო გრანტის მაქსიმალური ოდენობით სრულად დაუფინანსდებათ. მთავრობის გადაწყვეტილებით, იგივე პირობებით ისარგებლებენ აზერბაიჯანის ტერიტორიაზე მცხოვრები ქართველი აბიტურიენტები.

ამ დრომდე დაკეტილი ენგურის ხიდზე ე.წ. გადასასვლელი და ოკუპირებულ რეგიონში დარჩენილი მოსახლეობა ცენტრალური ხელისუფლების მიერ კონტროლირებად ტერიტორიაზე გადმოსვალს ვერ ახერხებს. იგივე სიტუაციაა ოკუპირებულ ცხინვალის რეგიონშიც.

რაც შეეხება ეროვნულ გამოცდებს, ის დღეს 6 ივლისს დაიწყო და 25 ივლისამდე გაგრძელდება.

"ცნობილი მიზეზების გამო წელს უჩვეულო გარემოში გვიწევს ერთიანი ეროვნული გამოცდების ჩატარება, თუმცა დარწმუნებული ვართ, ამ გამოწვევის მიუხედავად, აბიტურიენტები მაქსიმალურად შეძლებენ საკუთარი ცოდნისა და შესაძლებლობების გამოვლენას.

ეს გამორჩეული თაობაა, მათ უკვე დაამტკიცეს, რომ შეუძლიათ გაუმკლავდნენ გამოწვევებს, რაც თან ახლდა დისტანციურ სწავლებას. მჯერა, რომ ასეთივე წარმატებით, ისინი თავს გაართმევენ ერთიან ეროვნულ გამოცდებს", — ამ სიტყვებით მიმართა მინისტრმა აბიტურიენტებს.