საჰაერო მიმოსვლის აღდგენის მოთხოვნით მთავრობის ადმინისტრაციასთან ემიგრანტების ოჯახის წევრებმა და სტუდენტებმა აქცია გამართეს. ამის შესახებ ინფორმაციას მთავარი არხი ავრცელებს.

"ძალიან ბევრი ემიგრანტი ვიცი, რომელიც ახლა რეალურად ვერ ჩამოდის იმიტომ, რომ ხელისუფლების უგუნურმა გადაწყვეტილებამ ფაქტობრივად ისინი ჩატოვა, მათ სამსახურები არ აქვთ, სხედან და ვეღარ მოდიან. უმეტესობას ბილეთი აქვს ნაყიდი მე მაინტერესებს, ზალკალიანი, რომელიც დაკავებულია პოლიტიკური განცხადებებით, მისი პირველი პრეროგატივაა იზრუნოს ემიგრანტებზე", — თქვა აქციის ერთ-ერთმა მონაწილემ.

აქციის კიდევ ერთმა მონაწილემ მთავარ არხთან საუბრისას აღნიშნა, რომ მისი შვილი მე-5 თვეა პოლონეთიდან დაბრუნებას ვერ ახერხებს.

ამ თემასთან დაკავშრიებით დღეს, 30 ივნისს ეკონომიკის მინისტრმა, ნათია თურნავამ აღნიშნა, რომ კორონავირუსის მეორე ტალღის მოლოდინში ფრენებს "სტიქიურად" ვერ გახსნიან, თუმცა ჩარტერული ფრენები ისეთი რეგულარობით იქნება, რომ ყველასთვის კომფორტული იყოს.

მისივე თქმით, საქართველო ევროკავშირის იმ ქვეყნების სიაში მოხვდა, რომლებისთვისაც მათი საზღვრები გაიხსნება. თუმცა მისი განმარტებით, სიაში იმ პირობით დარჩებიან, თუ კვლავინდებურად ეფექტურად დაიცავენ მოსახლეობას და ვიზიტორებს და გადაწყვეტილებებსაც აქედან გამომდინარე მიიღებენ.