იტალიის პრემიერმინისტრი, მატეო რენცი თანამდებობაზე 2,5-წლიანი საქმიანობის შემდეგ გადადგა. იტალიის პრეზიდენტს შესაბამისი განცხადებით ის დღეს მიმართავს. ამის შესახებ ინფორმაციას როიტერი ავრცელებს.

რენცის გადადგომის მიზეზი იმ რეფერენდუმის შედეგი იყო, რომელშიც საკონსტიტუციო რეფორმის მისი ვერსია ვერ გავიდა. იტალია, რომელიც ევროზონაში ეკონომიკის სიძლიერით მესამე ქვეყანაა, პოლიტიკურ არეულობაში გაეხვია.

რენცის სურდა რეფორმის გატარება იტალიის პოლიტიკურ სისტემაში. მას უნდოდა ცენტრალური მთავრობის გაძლიერება და სენატისთვის ძალაუფლების შემცირება. მისი ოპონენტები მიიჩნევდნენ, რომ რეფორმა თავად პრემიერს მეტისმეტ ძალაუფლებას მიანიჭებდა, რასაც დაეთანხმნენ ამომრჩევლებიც.

თუმცა ეს რეფერენდუმი მხოლოდ კონსტიტუციურ ცვლილებებს არ ეხებოდა, ის ასევე განიხილებოდა, როგორც ძველი პოლიტიკური ელიტისა და დადგენილი სისტემის შეცვლის შანსი.

იტალიელების მხოლოდ 40,9 პროცენტმა დაუჭირა მხარი მის მიერ შეთავაზებულ ცვლილებებს, 59,1%-მა კი რენცის წინააღმდეგ მისცა ხმა. რეფერენდუმში მონაწილეობა 33-მა მილიონმა იტალიელმა მიიღო.

მატეო რენცის გადადგომის გადაწყვეტილება ევროკავშირთან არსებული შეთანხმებების შეწყვეტასაც ეხმაურება. რენცის მხარს უჭერდნენ საერთაშორისო ლიდერები. მათ შორის ბარაკ ობამა.

გადაწყვეტილებას უკვე მოჰყვა ევროს გაუფასურება დოლართან მიმართებაში.

რენცის გადადგომის შემდეგ, მომავალ წელს იტალიაში ვადამდელი არჩევნები ჩატარდება, რომელშიც მაღალი ალბათობით ანტი-ევროპული პარტია გაიმარჯვებს.