სახელმწიფო ინსპექტორის სამსახურმა ფეხბურთელ გიორგი შაქარაშვილის საქმეზე დაკავებულ ერთ-ერთ არასრულწლოვანზე გამოძიება დაიწყო. დაკავებული არასრულწლოვანი მამა ინტერპრესნიუსთან საუბარში აცხადებს, რომ მასზე პოლიციელმა დაკითხვისას ზეწოლა განხორციელდა. იგი აცხადებს, რომ მის შვილს გამოკითხვისას პოლიციელმა ჯერ კეფაში, შემდეგ კი, ზურგში ჩაარტყა, რათა სასურველი ჩვენება მიეღო.

სახელმწიფო ინსპექტორის სამსახურმა On.ge-ს დაუდასტურა, რომ გამოძიება ორი მუხლით დაიწყო, მათ შორის, სისხლის სამართლის კოდექსის 333-ე მუხლის მე-3 ნაწილის ბ ქვეპუნტქით (სამსახურებრივი უფლებამოსილების გადამეტება) და 335-ე მუხლით ( განმარტების, ჩვენების ან დასკვნის მიცემის იძულება).

ინსპექტორის სამსახურში ამბობენ, რომ გამომძებელი უკვე შეხვდა და გაესაუბრა არასრუწლოვანს და გრძელდება საგამოძიებო მოქმედებები.

შინაგან საქმეთა სამინისტრომ 19 წლის ფეხბურთელის, გიორგი შაქარაშვილის საქმეზე 17 პირი დააკავა. როგორც მინისტრის მოადგილემ ბრიფინგზე განაცხადა, გამოძიებით დგინდება, რომ დაკავებულებმა ჩაიდინეს ჯგუფური ძალადობის ორგანიზება, მასში მონაწილეობა, თავისუფლების უკანონო აღკვეთა და ორი ან მეტი პირის მიმართ ჯგუფური ძალადობა. საქმეზე გამოძიება სისხლის სამართლის კოდექსის 225-ე, 143-ე და 126-ე მუხლებით გრძელდება.