ფინანსთა მინისტრის, ივანე მაჭავარიანის თქმით, თბილისის მერის მიერ დეზინფორმაციაზე დაწყებული ახალი პროექტის ბანერის ვიზუალური მხარის შეფასება ესთეტიკის საკითხია. როგორც მან აღნიშნა, ამ თემაზე კითხვა დიზაინერს უნდა დაუსვან.

"ესთეტიკის საკითხები ჰკითხეთ სხვას, რა როგორ უნდა გამოიყურებოდეს, რა ფერი უნდა იყოს, ესთეტიკაზე დიზაინერს ელაპარაკეთ", — განაცხადა მაჭავარიანმა.

პოსტერის ვიზუალურ მხარესთან დაკავშირებით განმარტებები თბილისის მერმა, კახა კალაძემ გააკეთა და თქვა, რომ ფეისბუქში გამოქვეყნებულ ანონსში მთავარი არხის, ფორმულასა და TV პირველის ლოგოები არა სისხლში "არამედ ტყუილებშია ჩაღვენთილი".

25 ივნისს თბილისის მერმა განაცხადა, რომ ფეიკნიუსის წინააღმდეგ ვიდეოჩართვებს იწყებს. მისი თქმით, ყველას, ვინც მერიისა და მის წინააღმდეგ ცრუ ინფორმაციას ავრცელებს, "ცხვირ-პირში სიმართლის მუშტი მოხვდებათ".

როგორც კალაძე ამბობს, რადგან არჩევნები ახლოვდება, პოლიტიკოსებსა და მედიასაშუალებებში ცრუ და ცილისმწამებლური ინფორმაციის გავრცელებამ იმატა და სწორედ ამიტომ, აპირებს, რომ მათ "არგუმენტირებულად" და "რაციონალურად" უპასუხოს. მისი თქმით, ვიდეოჩართვებში მოსახლეობას აჩვენებენ, თუ როგორ ცდილობენ კონკრეტული მედიასაშუალებები საზოგადოების სიცრუეში შეყვანას.