თბილისის მერს კახა კალაძეს არ ერიდება, რომ ოფიციალურ ფეისბუქგვერდზე უდევს პოსტერი, რომელშიც სამი მედიის ლოგოები სისხლით არის დაფარული და მათი სახელებში "სიცრუე" არის ჩამატებული. ამის შესახებ მან ფორმულას ჟურნალისტს განუცხადა.

"ჩვენ არაფერს არ ვიგონებთ, ჩვენ პასუხები გვექნება თქვენივე გაკეთებულ სიუჟეტებზე. დღევანდელ გადაცემას დაელოდეთ, ეს არ იქნება პირველი და ერთადერთი, ამას ექნება ერთადერთი ხასიათი. დაელოდეთ და ყველაფერს ნახავთ", — განაცხადა კალაძემ და ჟურნალისტის კითხვის პასუხად არ დაასახელა ფეიკნიუსის გაშუქების არცერთი მაგალითი.

გუშინ, 25 ივნისს თბილისის მერმა განაცხადა, რომ ფეიკნიუსის წინააღმდეგ ვიდეოჩართვებს იწყებს. მისი თქმით, ყველას, ვინც მერიისა და მის წინააღმდეგ ცრუ ინფორმაციას ავრცელებს, "ცხვირ-პირში სიმართლის მუშტი მოხვდებათ".

როგორც კალაძე ამბობს, რადგან არჩევნები ახლოვდება, პოლიტიკოსებსა და მედიასაშუალებებში ცრუ და ცილისმწამებლური ინფორმაციის გავრცელებამ იმატა და სწორედ ამიტომ, აპირებს, რომ მათ "არგუმენტირებულად" და "რაციონალურად" უპასუხოს. მისი თქმით, ვიდეოჩართვებში მოსახლეობას აჩვენებენ, თუ როგორ ცდილობენ კონკრეტული მედიასაშუალებები საზოგადოების სიცრუეში შეყვანას.