TV პირველიდან წასული ჟურნალისტების, ნინო ჟიჟილაშვილისა და ვახო სანაიას გადაცემა პოლიტმეტრი ფორმულას ეთერში გაგრძელდება. ამის შესახებ On.ge-ს ჟიჟილაშვილმა განუცხადა.

მისი ინფორმაციით, პოლიტმეტრი ფორმულას ეთერში ყოველ სამშაბათსა და პარასკევს, 21:00 საათზე გავა.

"მომდევნო კვირის პარასკევიდან [3 ივლისი] ვიქნებით ეთერში. პროექტს მოამზადებს ზუსტად იგივე გუნდი", — უთხრა On.ge-ს ჟიჟილაშვილმა.

ამასთან, ფორმულას ინფორმაციით, განახლებული საეთერო ბადის შესახებ მეტი დეტალი კვირას, 20:00 საათზე გადაცემა დროებაში გახდება ცნობილი.

ნინო ჟიჟილაშვილმა და ვახო სანაიამ TV პირველიდან წასვლის შესახებ პირდაპირ ეთერში, 12 ივნისს განაცხადეს.

"ჩვენ ამ არხზე თითოეულ ნაბიჯზე ვიღებდით პასუხისმგებლობას, რაც, სამწუხაროდ, უკვე აღარ გამოგვდის. მარტივად რომ გითხრათ, ჩვენ უბრალოდ არ მოგვწონს, რაც ჟურნალისტური სტანდარტისა და ყველა სხვა კომპონენტის თვალსაზრისით TV პირველზე ხდება. არ მოგვწონს და ვერც ვერაფერს ვცვლით", — თქვა ჟიჟილაშვილმა.

ტელეწამყვანებთან ერთად, არხი დატოვეს გადაცემა პოლიტმეტრის პროდიუსერმა გიორგი დარჩიაშვილმა, პროდიუსერმა და ჟურნალისტმა ხატია შამანაურმა, წამყვანმა და ჟურნალისტმა გიორგი კიკაბიძემ, წამყვანმა და ჟურნალისტმა სოფო მაისურაძემ, პროდიუსერმა მიხო კოტეტიშვილმა.

ნინო ჟიჟილაშვილი თებერვლის ბოლოს საინფორმაციო სამსახურის უფროსად დაინიშნა, თუმცა თითქმის ორთვიანი მუშაობის შემდეგ პოსტი დატოვა. როგორც ტელეკომპანიის მაშინდელმა დირექტორმა, ინგა გრიგოლიამ On.ge-ს განუმარტა, საკადრო ცვლილება არჩევნების მოახლოებასა და ახალ ტოკ-შოუებს უკავშირდებოდა. ამასთან, თვითონ ტელეწამყვანმა განმარტა, რომ საინფორმაციო სამსახურის განვითარების მისი და არხის ხელმძღვანელების ხედვები ერთმანეთს არ დაემთხვა.

ჟიჟილაშვილის პოსტიდან წასვლა დროში დაემთხვა TV პირველში ნოდარ მელაძის გადასვლას. ნოდარ მელაძემ მთავარი არხის საინფორმაციო სამსახურის უფროსის თანამდებობა აპრილში დატოვა. ის TV პირველზე მთავარი პროდიუსერი გახდა და ყოველკვირეულად საავტორო გადაცემასაც წაიყვანს. მელაძესთან ერთად TV პირველში მთავარი არხის რამდენიმე ჟურნალისტიც გადავიდა.