მთავარი არხის თანამფლობელმა, ბრალდებულმა გიორგი რურუამ 24 ივნისის პროცესზე კიდევ ერთხელ განუცხადა მოსამართლეს, რომ მის მიმართ პოლიტიკური დევნა მიმდინარეოებს და სიმართლეს დაამტკიცებს. ბრალდებულმა ასევე მიმართა მოსამართლეს, რომ მასზე ზეწოლა ხორციელდება.

"ბატონო მოსამართლევ, მინდა ვისაუბრო იმ ზეწოლაზე, რომელიც ხორციელდება ჩემზე და თქვენზე. მინდა უბრალოდ მაგალითი მოვიყვანო, მსოფლიოში, მადუროს ვენესუელას, ბელარუსის, რუსეთის, სირიის გარდა, პატიმარზე ამდენს სად ლაპარაკობენ მინისტრები, ქალაქის მერი და პარლამენტარები. არის თუ არა ეს პოლიტიკურად დაინტერესებული საქმე და არის თუ არა ეს პოლიტიკურად შეკერილი საქმე?

[...] კიდევ ერთხელ ვაცხადებ, რომ მე არ ვარ დამნაშავე. ჩემ მიმართ არის პოლიტიკური დევნა და ეს აუცილებლად გამომჟღავნდება. მე ჩემს სიმართლეს დავამტკიცებ", — განაცხადა გიორგი რურუამ პროცესზე.

თბილისის საქალაქო სასამართლოში გიორგი რურუას საქმეზე მორიგი სხდომა მიმდინარეობს. სასამართლო დაცვის მხარის მოწმეთა დაკითხვის ეტაპზეა. ადვოკატებს დღეს რურუას გათავისუფლების შუამდგომლობა არ დაუყენებიათ.