ოქროს გლობუსის 2021 წლის დაჯილდოება რვა კვირით გვიან, 28 თებერვალს გაიმართება.

ოქროს გლობუსის დაჯილდოება, როგორც წესი, იანვრის პირველ კვირას ტარდება ხოლმე, თებერვლის ბოლოს კი ოსკარების ცერემონია იმართება. 22 ივნისს უცხოური პრესის ასოციაციამ ოფიციალური განცხადება გაავრცელა, სადაც აღნიშნულია, რომ ოქროს გლობუსი ოსკარების ტრადიციულ თარიღს "დაიკავებს" და დაჯილდოება თებერვლის ბოლოს გაიმართება.

მანამდე ერთი კვირით ადრე ამერიკის კინოაკადემიამ გაავრცელა ინფორმაცია, რომ ოსკარების 93-ე დაჯილდოება ორი თვით გვიან, 25 აპრილს გაიმართება.

უცხოური პრესის ასოციაციას ჯერჯერობით მომავალი ცერემონიის ფორმატის შესახებ დეტალები არ დაუზუსტებია, თუმცა ვიცით, რომ დაჯილდოება პირდაპირ ეთერში ამერიკულ ტელეარხ NBC-ზე გავა, მისი წამყვანები კი ტინა ფეი და ემი პოლერი იქნებიან.

ფოტო: Jim Smeal/BEI/Shutterstock

ოქროს გლობუსის დაჯილდოებაზე საუკეთესო ნამუშევრებს 85 ჟურნალისტისგან დაკომპლექტებული ასოციაცია გამოავლენს ხმის მიცემის საშუალებით. შედარებისთვის, იმავე პროცესში მონაწილეობას ოსკარების დაჯილდოებაზე კინოაკადემიის 8 500 წევრი იღებს.

გასულ წელს ოქროს გლობუსზე წლის საუკეთესო ფილმად სემ მენდესის 1917 დასახელდა.

კორონავირუსის პანდემიის გამო უამრავ კინოპროექტზე მუშაობა გაურკვეველი ვადით შეჩერდა, უკვე დასრულებული კინოსურათების პრემიერა კი კინოთეატრების დაკეტვის გამო გადაიდო. შესაბამისად, ამერიკის კინოაკადემიისა და უცხოური პრესის ასოციაციის გადაწყვეტილება, რომ ოსკარებისა და ოქროს გლობუსის დაჯილდოება გადაიდოს, კინოხელოვანებს აძლევს საშუალებას, რომ მათი პროექტების დასრულება და მაყურებლებისთვის წარდგენა მოასწრონ, რათა შემდეგ ამ პრესტიჟულ დაჯილდოებებზე მონაწილეობა შეძლონ.