არჩევნების დღეს უსაფრთხოების დაცვის საკითხებისა და კორონავირუსის პრობლემის სამართავად, პარლამენტი საარჩევნო კოდექსში შესატან ცვლილებათა პაკეტზე მუშაობას იწყებს. ამის შესახებ პარლამენტის თავმჯდომარემ, არჩილ თალაკვაძემ დღეს, 22 ივნისს ბიუროს სხდომაზე განაცხადა. მისივე თქმით, ამ საკითხის განსახილველად, შეხვედრა გაიმართა არასამთავრობო ორგანიზაციებთან, ჯანდაცვის სფეროს წარმომადგენლებთან და პოლიტიკურ პარტიებთან.

"ეს არის მაგალითად როგორ უნდა იყოს უზრუნველყოფილი არჩევნებში კარანტინში მყოფი პირების მონაწილეობა, ხმის მიცემის უფლება, რა წესები უნდა იყოს დაცული საარჩევ, ო უბანზე, პირბადის გამოყენება, ხელების დამუშავება, თუ სხვა უსაფრთხოების ზომები. გამოიკვეთა ის ძირითადი საკითხები, რომელთა ასახვა მოგვიწევს კანონმდებლობაში", — თქვა არჩილ თალაკვაძემ.

პარლამენტი ხვალ, 23 ივნისს საარჩევნო რეფორმასთან დაკავშირებულ საკონსტიტუციო ცვლილებებს მეორე მოსმენით უყრის კენჭს. არჩილ თალაკვაძის თქმით, კანონპროექტის განხილვა მომდევნო კვირაში დასრულდება.

21 ივნისს საქართველოს პარლამენტმა საკონსტიტუციო ცვლილებებს პირველი მოსმენით მხარი დაუჭირა. ცვლილებების თანახმად, არსებული საარჩევნო სისტემა უნდა შეიცვალოს და მომავალი მოწვევის პარლამენტში პარტიული სიით 77-ის ნაცვლად 120 დეპუტატს აირჩევენ, მაჟორიტარი კი 73-ის ნაცვლად მხოლოდ 30 იქნება. ცვლილებებს მხარი 136-მა დეპუტატმა დაუჭირა, 5-მა წინააღმდეგ მისცა ხმა.