საქართველოს სახალხო დამცველის ინფორმაციით, 20 ივნისის აქციის დაშლასთან დაკავშირებით მიცემულ ჩვენებაში იმჟამინდელმა შინაგან საქმეთა მინისტრმა და მისმა მოადგილეებმა თქვეს, რომ ცრემლსადენი გაზისა და წყლის ჭავლის გამოყენების ბრძანება გასცეს, მაგრამ რეზინის ტყვიების არა. ამის შესახებ საუბარია სპეციალურ დოკუმენტში, რომელიც ომბუდსმენის აპარატმა 20 ივნისის წლისთავთან დაკავშირებით გამოაქვეყნა.

"გიორგი გახარია, კახაბერ საბანაძე და ვლადიმერ ბორცვაძე იმყოფებოდნენ პარლამენტთან 20 ივნისის 22 საათიდან. მინისტრი და მისი მოადგილეები ჩვენებებში უთითებენ, რომ ცრემლსადენი გაზის ჭურვებისა და წყლის ჭავლის გამოყენება მოხდა მათი ბრძანებით, ხოლო რეზინის ტყვიების გამოყენებაზე ბრძანება არ გაუციათ. მინისტრი და მისი მოადგილეები ჩვენებებში უთითებენ, რომ რეზინის ტყვიების გამოყენებისთანავე, მალევე მათთვის ცნობილი გახდა, თუმცა არ აკონკრეტებენ ზუსტ დროს. მინისტრისა და მისი მოადგილეებისთვის
ამ ინფორმაციის მიწოდების საშუალება (პირადი ვერბალური კომუნიკაცია, რაცია, მობილური ტელეფონი, ტელეკომუნიკაცია და სხვა) გამოძიებას დადგენილი არ აქვს", — აღნიშნულია სახალხო დამცველის დოკუმენტში.

ამასთან, ამავე დოკუმენტის მიხედვით, 2019 წლის 20 ივნისს, აქციის მონაწილეების წინააღმდეგ ხელისუფლებამ 3 სახეობის იარაღი და 5 სახეობის ტყვია და ჭურვი გამოიყენა (სავარაუდოდ, საუბარია ცრემლსადენი გაზის ჭურვზე — რედაქცია).