ზაფხულის დადგომასთან ერთად გარემოში ტემპერატურა მკვეთრად იმატებს, რაც ერთი მხრივ საშუალებას გვაძლევს, თბილი ტანსაცმელი კარადაში რამდენიმე თვით შევინახოთ და ფერადი მაისურებით ვისეირნოთ ქუჩებში, თუმცა ამავდროულად სიცხე და მეტი ფიზიკური აქტიურობა ჩვენს ორგანიზმში გაუწყლოების საფრთხესაც აჩენს.

ყველამ კარგად ვიცით, რომ წყალი ჩვენი ყოველდღიური რაციონის მნიშვნელოვან ადგილს უნდა იკავებდეს, რათა ორგანიზმმა გამართულად ფუნქციონირება შეძლოს. ეს ფაქტორი კი კიდევ უფრო მნიშვნელოვანი განსაკუთრებით ცხელ ამინდებში ხდება და ახლა სწორედ იმ რამდენიმე მარტივ რჩევას გაგიზიარებთ, რომლებიც დაგეხმარებათ, რომ მეტი წყალი მიიღოთ.

1. დაისახეთ კონკრეტული მიზანი

ფოტო: Headspace

წყურვილის გრძნობა ყველას სხვადასხვანაირად აწუხებს ხოლმე: არსებობენ ადამიანები, რომლებსაც დღის განმავლობაში, შეიძლება, ერთ ჭიქაზე მეტი წყლის დალევის სურვილი არც კი გაუჩნდეთ.

თუმცა თუ გეცოდინებათ, რომ კონკრეტული რაოდენობის წყალი უნდა მიიღოთ, მაშინ ამ მიზნის შესრულებაც არ გაგიჭირდებათ. თანაც ეტაპობრივად რაოდენობის გაზრდაც შეგიძლიათ.

2. მუდამ თან ატარეთ წყლით სავსე ბოთლი

ფოტო: Adrien Ghenassia / Dribbble

ასე ყოველთვის გემახსოვრებათ, რომ თქვენ გვერდითაა წყალი, რომლითაც ყელის გასველება ნებისმიერ დროს შეგიძლიათ.

კარგი იქნება, თუ ამისათვის მრავალჯერად, მაგალითად, შუშის ბოთლს გამოიყენებთ, რითიც ხშირად პლასტმასის ბოთლებში ჩამოსხმული წყლის შეძენას აირიდებთ თავიდან და გარემოს დაბინძურებასაც ნაკლებად შეუწყობთ ხელს.

3. ჩამოწერეთ აპლიკაცია

ფოტო: Voicu Apostol / Dribbble

ისეთი აპლიკაციები, როგორებიცაა მაგალითად Waterlogged და Daily Water, დაგეხმარებათ, რომ დასახულ ამოცანას მეტი მონდომებით მიუდგეთ და ამავდროულად თქვენ მიერ მიღწეულ პროგრესს თვალი მიადევნოთ.

4. გაამრავალფეროვნეთ წყალი ხილით ან ბოსტნეულით

ფოტო: Kate Artiushenko / Dribbble

თუ აქამდე არ გიცდიათ, გეტყვით, რომ კენკრა და ციტრუსი ყველაზე გემრიელ არომატს სძენს და წყლის დალევა ნამდვილ დღესასწაულად გადაიქცევა.

5. მიიღეთ პროდუქტი, როლიც დიდი ოდენობით წყალს შეიცავს

ფოტო: Daryl Beaney

ამ მიზნის მიღწევა განსაკუთრებით გაგიმარტივდებათ, თუ ზოგადად ხილსა და ბოსტნეულს მეტ ყურადღებას მიაქცევთ. აი, საზამთროს, გრეიპფრუტის, კიტრისა და სალათის ფურცლის მსგავსი საკვები კი წყლის ნამდვილი საბადოები არიან!

6. ტკბილი გაზიანი სასმელები მინერალური წყლით ჩაანაცვლეთ

ფოტო: Graham Prentice / Dribbble

თქმა არ სჭირდება იმას, რომ წყურვილის დატკბილებული გაზიანი სასმელებით მოკვლა ყოვლად არასწორი გზაა, ამიტომაც მათი მიღება მაქსიმალურად უნდა შეზღუდოთ.

თუმცა თუ ხშირად გაქვთ მათი დალევის სურვილი, ეცადეთ, რომ მინერალური წყლით ჩაანაცვლოთ.

7. დალიეთ მეტი ჯანსაღი გამაგრილებელი სასმელი

ფოტო: Patrick Butler / Dribbble

სახლში მომზადებული ლიმონათი ან ცივი ჩაი თუ გაგისინჯავთ აქამდე? თუ არა, ამ უმარტივეს რეცეპტებს უნდა გაეცნოთ.

8. ბოლო რჩევა: უბრალოდ დალიეთ მეტი წყალი!

ფოტო: Eloi Raharinosy / Dribbble