აშშ იუსტიციის დეპარტამენტის ცნობით, 12 მაისს ბოსტონის პოლიციამ ქართველი ძმები ქონების მითვისებისა და გამოძალვის ფაქტზე დააკავა და ბრალი წაუყენა.

დაკავებულებს ბრალი ედებათ 2014 წელს, მასაჩუსეტსის შტატის ქალაქ ქვინსიში არსებული ერთ-ერთი კლინიკის მფლობელისთვის თანხის გამოძალვა და მითვისება.

გამოძიების ინფორმაციით, ისინი დაუკავშირდნენ სუბოქსონის (იგივე სუბუტექსის) კლინიკის მფლობელს და დაარწმუნეს, რომ სამედიცინო კლინიკების, მათ შორის სუბოქსონის ცენტრების მენეჯმენტის მრავალწლიანი გამოცდილება ჰქონდათ.

სუბოქსონი არის მედიკამენტი, რომელიც გამოიყენება ნარკოდამოკიდებული პაციენტების მკურნალობისას. ეს წამალი საქართველოში ცნობილია, როგორც სუბუტექსი.

ძმებმა კლინიკის მფლობელი დაარწმუნეს, რომ ახალი სამედიცინო ცენტრის გახსნას აპირებდნენ და თავიანთ პროექტში თანხის ინვესტირება შესთავაზეს. გარიგების თანახმად, თუ კლინიკა არ იმუშავებდა და ბიზნესი ჩავარდებოდა, ინვესტორს ჩადებული ფულის 50%, წლიური 5%-იანი დანამატით, 5 წელიწადში დაუბრუნდებოდა.

2014 წლის დეკემბერში ამერიკელი ინვესტორი ძმების წინადადებას დათანხმდა. თუმცა, თანხის სიდიდის გამო, კონტრაქტში საკუთარი პირობების ჩადება ითხოვა. ბრალდებულები ამ წინადადებას დათანხმდნენ, თუმცა გარკვეული დროს გასვლის შემდეგ, პარტნიორს წილის დათმობა მოსთხოვეს, ხოლო უარის შემთხვევაში, მას და მის ოჯახს ფიზიკური ანგარიშსწორებით დაემუქრენ.

დაზარალებულის ჩვენების მიხედვით, ერთ-ერთმა ძმამ მას უამბო, რომ აქამდე 9 ადამიანი და მათი ოჯახები "გააქრო", რადგან მათ მისი მოთხოვნები არ დააკმაყოფილეს. ასევე ემუქრებოდნენ მის მფლობელობაში არსებული კლინიკის დაწვით. მუქარის საფუძველზე, ერთ-ერთმა ძმამ მსხვერპლს, დამატებით, $3 500 გამოსძალა.

ბრალის დამტკიცების შემთხვევაში, დაკავებულებს 20-წლიანი პატიმრობა და $250 ათასიანი ჯარიმა ემუქრებათ.