სამოქალაქო მოძრაობის ლიდერის, ალეკო ელისაშვილის განცხადებით, მისთვის გულდასაწყვეტია, რომ ნაზი ჯანეზაშვილი და "სახელგატეხილი მოსამართლეები" ანა დოლიძის ერთნაირად უტევენ.

იუსტიციის უმაღლესი საბჭოს არამოსამართლე წევრი, ნაზი ჯანეზაშვილი ამბობს, რომ ანა დოლიძე, რომელიც ასევე საბჭოს არამოსამართლე წევრია, პოლიტიკური საქმიანობით კანონს არღვევს.

დღეს, 18 ივნისს ანა დოლიძემ, ალეკო ელისაშვილმა, ლევან კობერიძემ და ლევან იოსელიანმა ახალი პოლიტიკური პლატფორმა შექმნეს. როგორც ელისაშვილი ამბობს, მათ მხოლოდ პლატფორმა წარადგინეს და არა პოლიტიკური პარტია:

"მე იურისტი არ ვარ, იურიდიულ დეტალებზე ნუ მეკითხებით, მე შემიძლია ემოცია გითხრათ ჩემი. ნაზი ჯანეზაშვილი და გვრიტიშვილი ერთნაირად რომ ლაპარაკობენ და ერთნაირად უტევენ ანა დოლიძეს, ეს ჩემთვის გულდასაწყვეტი და დაუჯერებელიც კი არის ნამდვილად".

არასამთვარობო ორგანიზაციები საქართველოს იუსტიციის უმაღლესი საბჭოს არამოსამართლე წევრის, ანა დოლიძის მიერ სამოქალაქო მოძრაობა ხალხისთვის დაფუძნებას ეხმიანებიან და ამბობენ, ეს მის მიერ ამჟამად დაკავებულ თანამდებობასთან შეუთავსებელია. ამასთან დაკავშირებით რამდენიმე ორგანიზაცია ერთობლივ განცხადებას ავრცელებს და დოლიძეს მოუწოდებს, რომ თუ ის უახლოეს მომავალში პოლიტიკურ საქმიანობას აპირებს, გადაწყვეტილება თანამდებობის დატოვების შესახებ თავად და დროულად მიიღოს.