პრეზიდენტი ვლადიმერ პუტინი ამბობს, რომ რუსეთი კორონავირუსის ეპიდემიიდან "მინიმალური დანაკარგებით გამოდის". გამოცემა მედუზა წერს, რომ ამის შესახებ პუტინმა გადაცემაში მოსკოვი. კრემლი. პუტინი ისაუბრა.

"გარკვეული დანახარჯების, პრობლემების, დანაკარგების პირობებში, ჩვენ მაინც საკმაოდ რიტმულად, ასე რომ ვთქვათ, ვმუშაობთ და კორონავირუსთან დაკავშირებული სიტუაციიდან საკმაოდ თავდაჯერებულად, მინიმალური დანაკარგებით გამოვდივართ", — განაცხადა პუტინმა.

რუსეთის ხელისუფლების მიერ გავრცელებული სტატისტიკით, ქვეყანაში ამ დროისთვის 528 267 შემთხვევაა გამოვლენილი, ხოლო ვირუსის შედეგად 6 938 გარდაიცვალა. შემთხვევების მაჩვენებლით რუსეთი მსოფლიოში მესამე ადგილს იკავებს.

რამდენიმე დღის წინ ჯანდაცვის მსოფლიო ორგანიზაციის წარმომადგენელმა, მაიკლ რაიანმა განაცხადა, რომ რუსეთში დაავადებულთა მიმართ გარდაცვალების დაბალი მაჩვენებელი უჩვეულოა.

მისივე თქმით, რუსეთში მოსახლეობის საშუალო ასაკი და ჯანდაცვის სისტემა დიდად არ განსხვავდება ევროპული ქვეყნებისგან, სადაც COVID-19-ით გარდაცვალება უფრო მაღალია.