საგარეო საქმეთა მინისტრი, დავით ზალკალიანი აცხადებს, რომ უკრაინაში თანამდებობაზე მიხეილ სააკაშვილის დანიშვნას "დიდი შეურაცხყოფა" უწოდა. როგორც მან ღამის კურიერში აღნიშნა, ამის მიუხედავად ისინი პარტნიორის ინტერესებს პატივს სცემენ.

ზალკალიანის თქმითვე, მათ სააკაშვილის განცხადებაზე რეაქცია ექნებათ ისე, რომ სტრატეგიული პარტნიორობა არ გაფუჭდეს.

"თუ კი ჩვენ ვცემთ პატივს და სტრატეგიული პარტნიორის ინტერესებს ვითვალისწინებთ, მიუხედავად ამ დიდი, მე ვიტყოდი, შეურაცხყოფისა... აი, სააკაშვილის მნიშვნელოვან პოსტზე თუნდაც განხილვას. მე ეს აღვიქვი ჩვენს უპატივცემულობად და ამის მოუხედავად, მაინც თავშეკავებულები ვართ და ყველანაირად ვცდილობთ, მოზომილი კომენტარები [გავაკეთოთ]... მე თუ ვცემ ამ სტრატეგიულ პარტნიორობას პატივს და რაღაცნაირად გამოვიდე... სტრატეგიული პარტნიორობის არსი ხო იმაშია, რომ ეს ორმხრივი პროცესია", — განაცხადა ზალკალიანმა.

საქართველოში უკრაინის ელჩი მინისტრმა, დავით ზალკალიანმა 11 ივნისს დაიბარა. ზალკალიანის განცხადებით, მათ აქვთ კითხვები, რატომ ერევა "უკრაინის მოქალაქე და მაღალჩინოსანი" მიხეილ სააკაშვილი ქვეყნის შიდა საქმეებში და პირდაპირ საარჩევნო პროცესში. ზალკალიანი ამ ფორმით სააკაშვილის იმ განცხადებას, გამოეხმაურა, რომლის მიხედვითაც, ექსპრეზიდენტი საარჩევნო პროცესში წინა ხაზზე ყოფნას აპირებს.

• ივანიშვილთან ბრძოლაში წინა ხაზზე ვიქნები, ყველა უნდა გავერთიანდეთ, ადგილების გაყოფის დრო არაა — სააკაშვილი

საგარეო საქმეთა სამინისტროში მისვლის შემდეგ საქართველოში უკრაინის ელჩმა, იგორ დოლგოვმა განაცხადა, რომ მიხეილ სააკაშვილი საჯარო მოხელე არაა და მას აქვს უფლება საქართველოში მიმდინარე სხვადასხვა საკითხებზე თავისი პოზიცია დააფიქსიროს.

"უკრაინის პოზიცია აღნიშნულ თემაზე არის ის, რომ სააკაშვილი არ არის საჯარო მოხელე ისაა ქართველი თავისი ცხოვრებით და ეროვნებით მის გულში მუდმივად არის საქართველო და მასზე საუბარს ვერ დავუშლით. გააჩნია თავისი ნოსტალგიები სამშობლოსთან, ვფიქრობთ, რომ აქვს უფლება სხვადასხვა საკითხებთან დაკავშირებით თავისი პოზიცია დააფიქსიროს რაც ბუნებრივია და ტრაგედიას არ წარმოადგენს", — თქვა იგორ დოლგოვმა.

საქართველოს ყოფილი პრეზიდენტი და უკრაინის რეფორმების საბჭოს თავმჯდომარე, მიხეილ სააკაშვილი ამბობს, რომ ბიძინა ივანიშვილის წინააღმდეგ ბრძოლის წინა ხაზზე ყოფნას აპირებს. როგორც სააკაშვილი ამბობს, საბოლოო გამარჯვებისთვის ემზადებიან, რადგან წელს "ან საბოლოოდ დაიღუპება ქვეყანა, ან გაიმარჯვებს და მესამე ვარიანტი არ არსებობს".

მიხეილ სააკაშვილი უკრაინის რეფორმების აღმასრულებელი კომიტეტის თავმჯდომარედ დაინიშნა. მანამდე, როგორც სააკაშვილი ამბობს, უკრაინის პრეზიდენტმა მას რეფორმების საკითხებში ვიცე-პრეზიდენტის პოსტი შესთავაზა.

ეს საკითხი ქართული ოცნებისთვის უკრაინასთან დიპლომატიური ურთიერთობის გადახედვის საბაბი გახდა. მთავრობისა და პარლამენტში მმართველი გუნდის ლიდერებმა უკრაინელ კოლეგებს უთხრეს, რომ ეს მათ შორის ნდობას შეარყევდა და კატეგორიულად მიუღებელი იყო. თავდაპირველად, უკრაინაში აცხადებდნენ, რომ ეს სუვერენული ქვეყნის საქმეში ჩარევის მცდელობაა. ერთი კვირის შემდეგ კი რადაში ხალხის მსახურის ფრაქციის ლიდერმა, დავიდ არახამიამ განაცხადა, რომ სააკაშვილისთვის მუშაობის ახალი ფორმატი იპოვეს.