საფრანგეთის ყველაზე ცნობილი ღირსშესანიშნაობა — ეიფელის კოშკი 25 ივნისს საჯაროდ გაიხსნება და ტურისტები კვლავ შეძლებენ მის დათვალიერებას.

პარიზის სავიზიტო ბარათად აღიარებული ეს კოშკი 13 მარტიდან მოყოლებული კორონავირუსის გავრცელების პრევენციისათვის მიღებული მკაცრი საკარანტინო ზომების გამო მთელი ეს პერიოდი დამთვალიერებლებისთვის დაკეტილი იყო.

ეიფელის კოშკის ოფიციალურ საიტზე გამოქვეყნებული მითითებების მიხედვით, 11 წელს ზევით ყველა სტუმარს აუცილებლად უნდა ეკეთოს პირბადე და ლიფტის ნაცვლად ყველას მხოლოდ კიბეებით გადაადგილება შეეძლება.

"თავდაპირველად დამთვალიერებლებს მხოლოდ კიბეებით სარგებლობის უფლება ექნებათ. იმისათვის, რომ ზევით და ქვევით მიმავალი ხალხის ნაკადი ერთმანეთს არ შეხვდეს, მოძრაობისას გამოყენებული იქნება აღმოსავლეთ და დასავლეთ მხარეები", — ვკითხულობთ მითითებებში.

ასევე აღნიშნულია, რომ საჯარო სივრცეებს ყოველდღიურად დაასუფთავებენ და დეზინფექციას ჩაუტარებენ, ამავდროულად კი შესაბამის ნიშნებს გამოიყენებენ, რათა სტუმრებს ფიზიკური დისტანციის დაცვა შეეძლოთ.

ეიფელის კოშკის გახსნა პარიზში მკაცრი კარანტინის გაუქმების მეორე ფაზის ნაწილია: ბოლო კვირებში საფრანგეთის დედაქალაქში ნელ-ნელა გაიხსნა კაფეები და რესტორნები. ამასთან დაკავშირებით რიგითი მოქალაქეების სიხარული ქვეყნის პრეზიდენტმა, ემანუელ მაკრონმაც გაიზიარა და ტვიტერის ანგარიშზე შემდეგი შინაარსის პოსტი გამოაქვეყნა:

"კაფეების, სასტუმროებისა და რესტორნების გახსნა ნიშანია იმისა, რომ ბედნიერ დღეებს ვუბრუნდებით!"

გადაჭედილი კაფე პარიზში, 2 ივნისი.

ფოტო: AFP

ივნისის დასაწყისში გაიხსნა პარიზის არაერთი ცნობილი მუზეუმი და გალერეა, რომელთაც სტუმრები, მართალია, გამკაცრებული უსაფრთხოების ზომებით, თუმცა უფრო მეტი ენთუზიაზმითა და სიხარულით მიიღეს.

რაც შეეხება ლუვრს, ოფიციალურად გავრცელებული განცხადების მიხედვით, მისი კარი დამთვალიერებლებისთვის 6 ივლისიდან გაიხსნება.

ამ ყველაფრის გათვალისწინებით, თამამად შეგვიძლია ვთქვათ, რომ დანარჩენ მსოფლიოსთან ერთად საფრანგეთიც პანდემიისგან მიყენებული საკმაოდ მძიმე შედეგების მიუხედავად, კვლავ უბრუნდება ცხოვრების ჩვეულ წესს, რაც იმას ნიშნავს, რომ წინ მართლაც კიდევ უამრავი ბედნიერი დღე გველოდება.