პროკურატურის ცნობით, დიდი ოდენობით საბიუჯეტო სახსრების გაფლანგვის ბრალდებით, შპს ორბიტას დირექტორი დააკავეს. მანამდე, მისმა კომპანიამ ხულოში "ხიხაძირი-თხილვანა-ბაკოს" საავტომობილო გზის მონაკვეთის რეაბილიტაციის ტენდერში გაიმარჯვა.

გამოძიების ვერსიით, კომპანიის დირექტორმა სახელმწიფო შესყიდვის ხელშეკრულების გაფორმებისას ხელშეკრულების შესრულებისა და საავანსო გადახდის უზრუნველყოფის ყალბი საბანკო გარანტიები წარადგინა. პროკურატურა ირწმუნება, რომ ამის საფუძველზე შპს ორბიტას საბანკო ანგარიშზე ჩაერიცხა ავანსის თანხა 188 000 ლარი, საიდანაც მხოლოდ 43 535 ლარის ღირებულების სამუშაოები შეასრულა, ხოლო ავანსის დარჩენილი თანხა — 144 465 ლარი, გაფლანგა.

სისხლის სამართლის საქმეზე გამოძიება გრძელდება. დაკავებულს ბრალდება საქართველოს სისხლის სამართლის კოდექსის 362-ე მუხლის მეორე ნაწილის "ბ" ქვეპუნქტით და 182-ე მუხლის მეორე ნაწილის "დ" და მე-3 ნაწილის "ბ" ქვეპუნქტებით წარედგინება, რაც სასჯელის სახედ და ზომად 7-დან 11 წლამდე თავისუფლების აღკვეთას ითვალისწინებს.