თბილისის სახელმწიფო უნივერსიტეტის მეორე კორპუსის სარეაბილიტაციო სამუშაოების მეორე ეტაპი 21,3 მლნ ლარით დაფინანსდა. ამის შესახებ უნივერსიტეტის პრესსამსახური ავრცელებს განცხადებას. მათივე ცნობით, დაფინანსება საქართველოს განათლების, მეცნიერების და სპორტის სამინისტრომ გამოყო.

განცხადებაში წერია, რომ მეორე კორპუსის შიდა სარემონტო სამუშაოები 2019 წელს დაიწყო და 2021 წელს დასრულდება:

"ამ პერიოდის განმავლობაში სრულად მოხდება შენობის რეაბილიტაცია, მოეწყობა სახანძრო და გაგრილება-ვენტილაციის სისტემები, ლიფტები. სარემონტო სამუშაოების შემდეგ მეორე კორპუსი სრულად დააკმაყოფილებს ყველა თანამედროვე საერთაშორისო სტანდარტს. სულ 25 000მ² ფართობი გარემონტდება".

თსუ-ს რექტორმა გიორგი შარვაშიძემ განაცხადა, რომ 2024 წლის ბოლოსთვის თბილისის სახელმწიფო უნივერსიტეტის ყველა ძირითადი სასწავლო კორპუსი გარემონტდება.

"[მეორე კორპუსის] სამუშაოების პირველი ეტაპი უკვე დასრულებულია, დაიწყო შიდა სამუშაოები. უკვე შეიცვალა 800 ფანჯარა, სახურავი, სველი წერტილები და ცენტრალური გათბობის სისტემა, გამაგრდა შენობა, გარემონტდა ფასადი. ახალი სასწავლო წლისთვის კორპუსის ნახევარი უკვე გარემონტებლი იქნება", — აღნიშნა თსუ-ს რექტორმა გიორგი შარვაშიძემ.

უნივერსიტეტის რექტორმა თსუ-ში დაგეგმილ ინფრასტრუქტურულ პროექტებზე საუბრისას აღნიშნა, რომ "იგეგმება უზარმაზარი საერთო საცხოვრებლის აშენება თსუ-ს მაღლივი კორპუსის მიმდებარედ, რომელშიც 3 000 სტუდენტი იცხოვრებს:

"ეს იქნება კავკასიაში ყველაზე დიდი სტუდენტური საერთო საცხოვრებელი, სტუდენტური ქალაქი, რომელიც, სავარაუდოდ, 2021 წელს დასრულდება".

თსუ მეორე კორპუსი 1940 წელს არქიტექტორ მიხეილ შავიშვილის პროექტით უნივერსიტეტის პირველი კორპუსის შენობის არქიტექტურისა და სტილის გათვალისწინებით აშენდა.