საქართველოს ფინანსთა სამინისტროს საგამოძიებო სამსახურის ინფორმაციით, მთავრობის კომპენსაციის მიღების მიზნით, კახეთში ყალბი ოფიციალური დოკუმენტების დამზადება-გასაღების ბრალდებით ერთი პირი დააკავეს.

გამოძიების ვერსიით, ერთ-ერთი კომპანიის ხელმძღვანელმა დაამზადა ყალბი სამსახურებრივი ცნობები 11 პირის სახელზე, რომელთა მიხედვითაც, მოქალაქეები თითქოსდა წარმოადგენდნენ ბრალდებულის კომპანიის მიერ დაქირავებულ თანამშრომლებს და 2020 წლის 21 მარტიდან COVID 19-ის გამო უხელფასო შვებულებაში იყვნენ.

თითოეული ასეთი ცნობა ბრალდებულმა 50 ლარის საფასურად გაასაღა. უწყების ცნობითვე, ბრალდებული ნასამართლევია ყალბი საგადასახადო დოკუმენტების დამზადება - გამოყენების ფაქტზე და ამჟამად იმყოფება პირობითი მსჯავრის ქვეშ. გამოძიება მიმდინარეობს საქართველოს სისხლის სამართლის კოდექსის 362-ე მუხლის პირველი ნაწილით, რაც სასჯელის სახით ითვალისწინებს თავისუფლების აღკვეთას 3-წლამდე ვადით.