ევროპარლამენტარმა, ევროპის მწვანეთა პარტიის წევრმა, ვიოლა ფონ კრამონმა კავკასიური სახლის მორიგ წერილსაც უპასუხა და თქვა, რომ მიმოწერაში თამასა დაბლა დაშვებას აგრძელებს. ევროპარლამენტარის თქმით, კავკავსიური სახლის ნარატივი ორივე წერილში აშკარა მსგავსებას ავლენს ქართული ოცნების ნარატივთან და იმეორებს რამდენიმე იმ პუნქტს, რომელსაც მთავრობის წევრები აჟღერებდნენ.

როგორც ევროპარლამენტარი ამბობს, გასაკვირია კავკასიური სახლის ჭოჭმანი შეახსენონ თქვენს ხელისუფლებას მათი ანგარიშვალდებულება და მოსთხოვონ სიტყვის შესრულება.

"მთავარი კითხვა, რომელსაც აქ პასუხი უნდა გაეცეს, არის ის, თუ რატომ უტევთ ასე გამალებით, აშკარა და მარტივად უარსაყოფი ტყუილებით თქვენს საერთაშორისო მოკავშირეს? რატომ აყენებთ თქვენი არასამთავრობო ორგანიზაციის სანდოობას კითხვის ნიშნის ქვეშ? იქნებ, სამართლიანობის პოვნის კეთილშობილური მიზანი კი არა პოლიტიკური მოტივი გამოძრავებთ?

თქვენი ნარატივი ორივე წერილში აშკარა მსგავსებას ავლენს ქართული ოცნების ნარატივთან და იმეორებს რამდენიმე იმ პუნქტს, რომელსაც მთავრობის წევრები აჟღერებდნენ. თქვენსა და ქართული ოცნების მხარდამჭერი ტელეკომპანია იმედის მიერ ჩემს წინააღმდეგ წარმოებული (სავარაუდოდ) ორგანიზებული მედია კამპანია ("პოლიტოლოგებად" წოდებული პირების მონაწილეობით) ასევე მიუთითებს იმაზე, რომ თქვენს წამოწყებაში მარტო არ მოქმედებთ.

მე ვურჩევდი კავკასიურ სახლს, რომ ან იყოს დამოუკიდებელი სამოქალაქო ორგანიზაციის სტატუსის ერთგული ან ღიად განაცხადოს თავისი პოლიტიკური მოტივების შესახებ. ჩვენ, თქვენს მოკავშირეებს, გვაქვს უფლება ვიცოდეთ, ვისთან გვაქვს საქმე", — წერს ფონკრამონი.

კავკასიურმა სახლი ევროპარლამენტარ ვიოლა ფონ კრამონს ორჯერ მისწერა. ევროპარლამენტარის პირველ საპასუხო წერილზე კავკასიურმა სახლამ გაცხადა, რომ ნაკლებ დიპლომატიური წერის სტილით იმედგაცრუებულები დარჩნენ. მათივე განცხადებით, ტექსტის სტილზე და აღქმაზე მსჯელობა უსასრულოდ შეიძლება, თუმცა შინაარსი "უმძიმეს რეალობას" ეხება.

კავკასიური სახლი წერილში აღნიშნავს, რომ ვიოლა ფონ კრამონის კეთილშობილურ მიზნებში ეჭვი არ ეპარებათ რისთვისაც მადლობას უხდიან მას და მთლიანად ევროკავშირს, თუმცა უჩნდებათ კითხვა: "რა შედეგი გამოიღო თქვენმა ძალისხმევამ?"

"მადლობას მოგახსენებთ საყოველთაოდ ცნობილი ჭეშმარიტების შეხსენებისთვისაც, რომ სამართლიან სასამართლოს დამნაშავეებიც იმსახურებენ. ისიც ცხადია, რომ ქართული ოცნების მართლმსაჯულება კრიტიკას ვერ უძლებს. და ფაქტი ფაქტად რჩება: შიდა თუ გარე მიზეზებით, საქართველოს პარლამენტში სააკაშვილის დანაშაულებრივი რეჟიმის მონაწილეები და მხარდამჭერები სხედან. და სამართლიანი სასამართლოც მათთვის არსებობს და არა რიგითი მოქალაქეებისთვის", — აღნიშნულია წერილში.

წერილს სხვებთან ერთად კავკასიური სახლის გამგეობის თავმჯდომარე, ნაირა გელაშვილი აწერს ხელს. კავკასიის სახლის პირველ წერილს ვიოლა ფონ კრამონმა უპასუხა და მას "სიმცდარითა და დეზინფორმაციით გაჯერებული" უწოდა.

ამავე თემაზე:

• სიმცდარითა და დეზინფორმაციით გაჯერებულია — ევროპარლამენტარის პასუხი კავკასიურ სახლს.