ქართული ოცნების დეპუტატის, ანრი ოხანაშვილის თქმით, ოპოზიციას ჯერ საერთო ღირებულებებზეც არ უსაუბრია ამიტომ ერთიან კანდიდატებზე ლაპარაკი არასერიოზულია. ეს კომენტარი მან მთავარ არხთან გააკეთა.

"მათ ჯერ იმაზე არ უსაუბრიათ რა ღირებულებები აერთიანებთ და რა სტრატეგია ექნებათ ქვეყნის განვითარებისთვის, რომელ პრემიერმინისტრობის კანდიდატზე ან სხვა საკითხებზეა საუბარი, რომ შეთანხმდნენ?! ვფიქრობ, ეს არის არასერიოზული დამოკიდებულება და საზოგადოება ამას არჩევნებზე განაჩენს გამოუტანს", — თქვა ანრი ოხანაშვილმა.

დეპუტატის თქმით, გაერთიანებული ოპოზიცია შეფასდება, როგორ არასერიოზული პოლიტიკური ჯგუფები.

საკონსულტაციო ფორმატით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ნაციონალური მოძრაობის განცხადებით, არის ოლქები, სადაც ცალსახად ერთი კანდიდატია საჭირო, თუმცა ზოგიერთში შეიძლება რამდენიმე კანდიდატის წარდგენა. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.