ექსპერტიზის დასკვნის თანახმად, ჯორჯ ფლოიდს კორონავირუსი ჰქონდა. ამასთან, გაკვეთის დასკვნაში აღნიშნულია, რომ კორონავირუსს ჯორჯ ფლოიდის სიკვდილთან კავშირი არ აქვს. გაკვეთის დროს დადგინდა, რომ ის ჟანგბადის ნაკლებობით გარდაიცვალა.

CNN-ის ინფორმაციით, ტესტი 26 მაისს, გარდაცვალების შემდეგ გააკეთეს და ის დადებითი იყო. როგორც ცნობილია, ფლოიდს კორონავირუსზე დადებითი პასუხი ჯერ კიდევ 3 აპრილს ჰქონდა.

აშშ-ში უკვე რამდენიმე დღეა აფროამერიკელი ჯორჯ ფლოიდის სიკვდილს აპროტესტებენ, რომელიც დაკავების დროს პოლიციელის გულგრილობისა და არაადამიანური ქმედებების გამო დაიღუპა. მიუხედავად იმისა, რომ ათეულობით ქალაქში კომენდანტის საათი გამოაცხადეს, დემონსტრანტები შეზღუდვას არ ითვალისწინებენ.

მოქალაქეები სისტემაში არსებული რასიზმის წინააღმდეგ გაერთიანდნენ. გამონათქვამებისა და ტვიტების გამო რასიზმში ადანაშაულებენ აშშ-ს პრეზიდენტ დონალდ ტრამპსაც.

მშვიდობიანად დაწყებული პროტესტი არეულობასა და დარბევაში გადაიზარდა. დემონსტრანტები ცეცხლს უკიდებენ მანქანებს და არბევენ მაღაზიებს, პოლიცია კი ცრემლსადენ გაზსა და რეზინის ტყვიებს იყენებს.

3 ივნისს ფლოიდის დაკავების დროს მონაწილე კიდევ სამ ყოფილ პოლიციელს ბრალი წაუყენეს და მკვლელობის ხელშეწყობასა და წახალისებას ედავებიან. დერეკ შოვინს კი, რომელის ფლოიდს კისერზე ფეხს აჭერდა და არ უშვებდა, ბრალი დაუმძიმეს.