ლელოს დამფუძნებლის, მამუკა ხაზარაძის განცხადებით, პარტიებმა უნდა დაიწყოს გაერთიანება არა ვინმეს წინააღმდეგ, არამედ რამის შესაქმნელად. მისი თქმით, 30 წლის განმავლობაში ქართული პოლიტიკა არსებობს პრინციპით "ყველა ერთის წინააღმდეგ", რაც შედეგობრივად არავის წაადგა და ეს პარადიგმა უნდა შეიცვალოს.

"ჩვენ უნდა დავივიწყოთ გაერთიანება ვიღაცის წინააღმდეგ, ჩვენ უნდა გავერთიანდეთ რაღაცის შესაქმნელად, რომელიც ავტომატურად გულისხმობს იმ ვიღაცეების ჩამოშორებას პოლიტიკიდან. როცა შენ ვიღაცის დამარცხებისთვის ხარ მობილიზებული და არა შენი გამარჯვებისთვის, ორი სხვადასხვა რაღაცაა", — განაცხადა მან პალიტრა ნიუსის ეთერში.

მანვე აღნიშნა, რომ ლელო არა ამ არჩევნებისთვის, არამედ "გრძელვადიანი მოგზაურობისთვის" შეიქმნა, რასაც გრძელვადიანი სტრატეგია სჭირდება, ამიტომ ისინი დამოუკიდებლად გავლენ არჩევნებზე. მისი თქმით, თუ ვინმეს მათთან შეერთება უნდა, ამისთვის მზად არიან.

"რომ დაამარცხებ, მერე მოტრიალდები და მიხვდები, ვისთან ერთად დაამარცხე, რომელთანაც შენ საერთო არაფერი გაკავშირებს, არც მორალური, არც ისტორიის თვალსაზრისით, არც პოლიტიკური გემოვნების თუ იდეოლოგიის თვალსაზრისით. მე ყველაზე არ მაქვს ლაპარაკი. მერე იწყება ისევ ქაოსი. მერე აღმოჩნდება ისევ ვიღაცა, რომელიც აღმოჩნდება პრობლემა ამ პოლიტიკის", — განაცხადა მან.

საკონსულტაციო ფორმატით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ნაციონალური მოძრაობის განცხადებით, არის ოლქები, სადაც ცალსახად ერთი კანდიდატია საჭირო, თუმცა ზოგიერთში შეიძლება რამდენიმე კანდიდატის წარდგენა. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.