პარლამენტში ფრაქცია დამოუკიდებელი დეპუტატების წევრი, ლევან კობერიძე აცხადებს, რომ ჯანდაცვის კომიტეტზე არმისვლით მინისტრმა, ეკატერინე ტიკარაძემ კანონი დაარღვია. მისივე თქმით, ჯანდაცვის მინისტრობის განმავლობაში ტიკარაძე პროფილურ კომიტეტში არცერთხელ არ ყოფილა.

ჯანმრთელობის დაცვისა და სოციალურ საკითხთა კომიტეტზე მინისტრი ტიკარაძე სწორედ დამოუკიდებელმა დეპუტატებმა დაიბარეს. გუშინ, 2 ივნისს მინისტრმა წერილობით მიმართა კომიტეტს, მისი მისვლა კომიტეტზე თვის ბოლოსთვის გადაედოთ.

როგორც კობერიძე ამბობს, მათ მინისტრთან მხოლოდ პროფესიული მსჯელობა სურთ და დებატებში შესვლას არ აპირებენ, რადგან "ტიკარაძე პოლიტიკური დებატებისთვის ძალიან სუსტია".

"მნიშვნელოვანია გაიმართოს პროფესიული მსჯელობა და არა პოლიტიკური. არავინ აპირებს მასთან პოლიტიკურ დებატში შესვლას, მით უმეტეს კომიტეტის ფარგლებში. მეორე მხრივაც, მინდა გითხრათ, რომ ძალიან სუსტია ქალბატონი ეკატერინე პოლიტიკური დებატებისთვის და ნამდვილად არ ვაპირებთ მასთან საგნობრივ-პოლიტიკურ დებატს", — აღნიშნა კობერიძემ.

მისივე თქმით, მთავრობის წარმომადგენლებს ნაციონალური მოძრაობის ინტერპელაციაზე მისვლა ეკომფორტულებად. ტიკარაძის შემთხვევაში კი, კობერიძე კომპეტენციის საკითხსაც სვამს.

"როგორც ჩანს გარკვეული პოლიტიკური გათვლები არის. როგორც ჩანს, ეკომფორტულებად ნაციონალურ მოძრაობასთან ქართული ოცნების მინისტრებს საუბარი. ჩვენთან არ ეკომფორტულებად, რადგან იციან, რომ მსგავსად ვერ მიმართავენ და ადვილად შეუძლიათ ნაციონალური მოძრაობის ოპონირება აიცილონ და გაუმკლავდნენ ადვილად. მეორე, ან კომპეტენციაში გვაქვს პრობლემა. რადგან ყველამ იცის, როდესაც კომიტეტში მინისტრი მოდის, იქ მიდის საგნობრივი მსჯელობა. ეს არ არის მინისტრის საათი ან ინტერპელაცია, როცა მინისტრს კითხვას უსვამ, რათა მერე თავის გუნდთან ერთად ორი საათის განმავლობაში საუკეთესო პასუხი დაწეროს, მოძებნოს და მერე დაბრუნდეს. მას მოუწევდა დღეს აქ ძალიან ცოცხალ დისკუსიაში ყოფნა. ეტყობა დისკომფორტს განიცდის", — განაცხადა კობერიძემ.

ლევან კობერიძე ამბობს, რომ მინისტრებმა რეგლამენტი არ იციან და პარლამენტის ადმინისტრაციას სთხოვა, რომ მათთვი სემინარები ჩაატარონ.