რესპუბლიკური პარტიის წევრი, დავით ბერძენიშვილი არ გამორიცხავს, რომ რომელიმე რესპუბლიკელი მაჟორიტარობის კანდიდატი იყოს. კონკრეტულად ვინ იქნება მათი პარტიიდან მაჟორიტარობის კანდიდატი, ბერძენიშვილი ჯერ არ ასახელებს.

მისი თქმით, რესპუბლიკური პარტია სახელისუფლებო ძალასთან დაპირისპირებულ ნებისმიერ მაჟორიტარ კანდიდატს, რომელიც პროდასავლური ორიენტაციის პარტიიდან იქნება, მხარს დაუჭერს.

როგორც ბერძენიშვლი ამბობს, რესპუბლიკელებს ყველა ოპოზიციურ პარტიასთან, ასევე ნაციონალურ მოძრაობასთან და ევროპულ საქართველოსთანაც, ძალიან კორექტული ურთიერთობა აქვს.

"დამოკიდებულებები ამა, თუ იმ მაჟორიტარი კანდიდატის მიმართ იქნება იმის მიხედვით, როგორი იქნება ამ პარტიასთან დამოკიდებულება. არ ველოდები მეორე ტურში რომელიმე ისეთი პარტიის კანდიდატს, ვისი მხარდამჭერების ზედა ზღვარი 20-25%-ზე ნაკლებია. ოპოზიციაში პროდასავლური ელექტორატი განუზომლად მეტია, ვიდრე პრორუსული.

მე ვვარაუდობ, რომ ძალიან სასარგებლო იქნება ესა თუ ის პოლიტიკური გაერთიანება, რომელიც ძალიან კონკურენტუნარიანი ოპოზიციაში, თუ ჩაატარებს გამოკითხვებს, საიდანაც გამოჩნდება მისი ნომრით, რომელი კანდიდატის კენჭისყრა იქნებოდა უფრო მომგებიანი", — განაცხადა ბერძენიშვილმა რუსთავი 2-თან.

საკონსულტაციო ფორმატით გაერთიანებულ ოპოზიციაში ჯერ კიდევ მსჯელობენ, როგორ წარადგენენ მაჟორიტარებს. ევროპულ საქართველოში აცხადებენ, რომ მაჟორიტარულ ოლქებში ოპოზიციის შეთანხმება პირველ ტურში უნდა მოხდეს და მეორე ტურში ერთმანეთის მხარდაჭერა ისედაც იგულისხმება. ნაციონალური მოძრაობის განცხადებით, არის ოლქები, სადაც ცალსახად ერთი კანდიდატია საჭირო, თუმცა ზოგიერთში შეიძლება რამდენიმე კანდიდატის წარდგენა. ლელო აპირებს, რომ ყველა მაჟორიტარულ ოლქში თავისი კანდიდატი წარადგინოს. სხვა პარტიების გადაწყვეტილება, ამ ეტაპზე უცნობია.

მმართველ გუნდს მაჟორიტარ კანდიდატებზე ჯერ არაფერი უთქვამს, თუმცა უმრავლესობის ლიდერმა, გია ვოლსკიმ გაამხილა კრიტერიუმები, რომლებიც აუცილებელი ქართული ოცნების სიაში ახალი სახეების მოსახვედრად: საექსპერტო მონაცემები, პატრიოტიზმი, თავდადება.