დღეს სამ საათზე ტელეკომპანია რუსთავი 2-ის გენერალურმა დირექტორმა ნიკა გვარამიამ ბრიფინგი გამართა, სადაც განაცხადა, რომ, რუსთავი 2-ის საქმეზე გადაწყვეტილების მიღებამდე, უზენაეს სასამართლოზე ზეწოლა ხორციელდება, რასაც ბიძინა ივანიშვილი სხვადასხვა ადამიანების დახმარებით ახერხებს.

"ხელისუფლებას მიღებული აქვს გადაწყვეტილება რუსთავი 2-ის წაღებასთან დაკავშირებით. ეს გადაწყვეტილება მიღებული აქვს ბიძინა ივანიშვილს და მისი დახმარებით, მაღალჩინოსნები ახორციელებენ სასამართლოზე ზეწოლას".

გვარამიას თქმით, უზენაესი სასამართლო არ იზიარებს, მისი თქმით, ზეწოლით ნაკარნახევ საბოლოო გადაწყვეტილებას:

"სასამართლო ჩვენი ინფორმაციით ბოლომდე წინააღმდეგობას წევს და არ იზიარებს ბიძინა ივანიშვილის გადაწყვეტილებას, იმისათვის რომ გადაარჩინოს დემოკრატია საქართველოში და სასამართლოების ისედაც შებღალული რეპუტაცია და პროფესიული ღირსება".

გვარამია სასამართლოზე ზეწოლაში ადანაშაულებს იუსტიციის მინისტრს, თეა წულუკიანს, შალვა თადუმაძეს, ოთარ ფარცხალაძესა და მიხეილ ჩინჩალაძეს.

ჩინჩალაძეზე საუბრისას, რუსთავი 2-ის გენერალური დირექტორი აცხადებს, რომ ის ასრულებდა ხელისუფლების ნებას ნაციონალური მოძრაობის დროსაც და ამჟამად გადაბირებული ჰყავს ქართული ოცნების ხელისუფლებას.

გვარამია აცხადებს, რომ ბიძინა ივანიშვილს დავალებების შესასრულებლად ახალი პიროვნება ეხმარება:

"ეს არის ივანე ზარდიაშვილი, რომელმაც თავშესაფარი მისცა ჩინჩალაძის მეუღლეს, რომელიც მასთან მუშაობდა. დღეს ის პარლამენტშია, ეკა ბესელიას მოადგილედ, რომელიც თავის მხრივ იურიდიული კომიტეტის თავჯდომარეა. მისი მეშვეობით ხდება ზეწოლა სასამართლოზე და აქვს 3 დღე იმისთვის, რომ გარდამტეხი როლი შეასრულოს "მოლაპარაკებების" პროცესში".

რამდენიმე დღის წინ, უზენაესი სასამართლოს კოლეგიამ რუსთავი 2-ის საქმე დიდ პალატას გადასცა, რომელიც გადაწყვეტილებას კვირის ბოლოს მიიღებს. წაიკითხეთ, რა შემთხვევებში გადაეცემა საქმე უზენაესი სასამართლოს დიდ პალატას.