უკრაინის დედაქალაქ კიევში რადას შენობის წინ მიხეილ სააკაშვილმა აქცია გამართა, ლოზუნგით "ბოლო ზამთარი უკრაინის პარლამენტისთვის".

სააკაშვილმა მოსახლეობას მიმართა და უთხრა, რომ ის მთელ უკრაინას "ფეხზე დააყენებს" და მათი მთავარი მოთხოვნა ვადამდელი არჩევნები იქნება.

ფოტო: მიხეილ სააკაშვილი / კადრი ვიდეოდან

ოდესის ყოფილმა გუბერნატორმა აქციაზე შეკრებილებს უთხრა, რომ მათი მოთხოვნის წინააღმდეგ რადამ შეიძლება სხვადასხვა სახის აგიტაცია დაიწყოს, რასაც არ უნდა შეუშინდნენ:

"შესაძლოა უკრაინის ახლანდელმა ხელისუფლებამ განაცხადოს, რომ მათ დემოკრატიულად უნდა დაასრულონ თავისი მოღვაწეობა, რადგან შეიძლება შეგაშინონ, რომ ამ არეულობით რუსეთი ისარგებლებს და უკრაინა აგრესიის წინაშე აღმოჩნდება".

პარტია "ახალი ძალების პლატფორმა" ოპოზიციაში გადასულმა მიხეილ სააკაშვილმა 11 ნოემბერს დააფუძნა და უკრაინაში ვადამდელი არჩევნები მოითხოვა. სააკაშვილის თქმით, მისი მიზანია უკრაინაში შეცვალოს ე.წ. პოლიტიკური ელიტა, რომელსაც კორუფციაში ადანაშაულებს.

აქციას ესწრებოდა მიხეილ სააკაშვილის ცოლი სანდრა რულოვსიც, რომელმაც საქართველოს მეცხრე მოწვევის პარლამენტში შესვლაზე უარი განაცხადა.

ფოტო: მიხეილ სააკაშვილი / კადრი ვიდეოდან