შინაგან საქმეთა სამინისტროს თანამშრომლებმა, 1983 წელს დაბადებული ნ.ვ. ნარკოტიკული საშუალების უკანონო შეძენა-შენახვის და საქართველოში უკანონოდ შემოტანის ბრალდებით, წითელი ხიდის მიმდებარე ტერიტორიაზე დააკავეს.

შსს-ს ცნობით, მათ ფაქტზე ოპერატიული ინფორმაცია მიიღეს. უწყების პრესსამსახურის განცხადებით, ბრალდებული წარსულში ანალოგიური დანაშაულისთვისაა ნასამართლევი.

გამოძიების ინფორმაციით, დაკავებულის პირადი ჩხრეკისას, სამართალდამცველებმა ნარკოტიკული საშუალება ამოიღეს, რომელიც, ექსპერტიზის დასკვნით 0,18 გრ ჰეროინს შეიცავს.

გამოძიების ინფორმაციით, დაკავებულს ნარკოტიკული საშუალება საქართველოში აზერბაიჯანის რესპუბლიკიდან შემოჰქონდა. ბრალდებული ჩადენილ დანაშაულს აღიარებს.

გამოძიება ნარკოტიკული საშუალების არაერთგზის უკანონო შეძენა-შენახვის და საქართველოში არაერთგზის უკანონოდ შემოტანის ფაქტებზე მიმდინარეობს (საქართველოს სსკ-ს 260-ე მუხლის მე-3 ნაწილის „დ“ ქვეპუნქტით და 262-ე მუხლის მე-3 ნაწილის „ბ“ ქვეპუნქტით).