დაავადებათა კონტროლის ცენტრის დირექტორის მოადგილე, პაატა იმნაძე ამბობს, რომ კონტაქტების ძიებისას 10-მდე შემთხვევა იპოვეს ისეთი ადამიანების, რომელთაც გადატანილი აქვთ კორონავირუსი. დღეს, 28 მაისის ბრიფინგზე საუბრისას, იმნაძემ აღნიშნა, რომ ასეთი ადამიანები ნამდვილად იყო, მაგრამ "თითებზე ჩამოსათვლელი".

"ნამდვილად იყო ასეთი ადამიანი, ვისაც გადატანილი აქვს კორონავირუსი და ვერ გაიგო. ჩვენ ასეთ ტესტებს დიდი ხანია ვატარებთ, იმ შემთხვევაში, როდესაც ვეძებდით ინფიცირებულთა კონტაქტებს. მათ ვიკვლევდით არა მხოლოდ PCR დიაგნოსტიკით, არამედ, ანტისხეულებზეც.

გვაქვს დაახლოებით 10-მდე დადასტურებული შემთხვევა ადამიანების, მათ ვიკვლევდით არამხოლოდ სწრაფი ტესტით, არამედ "ელაიზა" მეთოდით. ეს უფრო დამაჯერებელი მეთოდია, რომ ანტისხეულები ნამდვილად არის. გერმანული ტესტებია", — განმარტავს პაატა იმნაძე.