საქართველოს კულტურული მემკვიდრეობის დაცვის ეროვნული სააგენტო, მოძრაობა ხალხისთვის ლიდერის, ანა დოლიძის კრიტიკას პასუხობს და აცხადებს, რომ შენობის ქირის ფულს საკუთარი შემოსავლით ფარავენ და ბიუჯეტის თანხები ამ გადასახადთან კავშირში არაა.

ანა დოლიძემ დღეს სპეციალურ ბრიფინგზე განაცხადა, რომ სააგენტო შპს სიყვარულსა და კოქტეილს, რომლისგანაც შენობის ქირაში თვეში 10 000 დოლარს უხდის. მისი თქმით, ეს თანხები ძეგლების რეაბილიტაციასა და ხალხის სოციალურ-ეკონომიკური პრობლემების მოგვარებაზე უნდა იხარჯებოდეს.

"ეს შენობა და აქ ჩვენი გადასახადების ფლანგვა, არის ერთ-ერთი მაგალითი იმ ათობის შემთხვევას შორის, სადაც იხარჯება სახელმწიფოს ბიუჯეტი და თქვენი გადასახადები ყაირათის გარეშე", — თქვა ანა დოლიძემ.

ანა დოლიძემ განაცხადა, რომ სახელმწიფოს ძალიან ბევრი შენობა და კვადრატული მიწა აქვს, სადაც შეუძლია სახელმწიფო შენობები განათავსოს. პასუხად სააგენტოს წარმომადგენელმა, ბექა ბარამიძემ On.ge-სთან განმარტა, რომ დოლიძემ ინფორმაცია არასწორად წარმოაჩინა. მისი თქმით, სააგენტოს 3 წლის განმავლობაში არაერთი მცდელობა ჰქონდა, რომ კუთვნილი ფართი მიეღო.

სააგენტოს განმარტებით 170 თანამშრომლიდან მხოლოდ 50 მუშაობს თაბუკაშვილზე მდებარე შენობაში, სადაც არქეოლოგიური, სამუზეუმო-საგამოფენო, საინფორმაციო სისტემების, საგანმანათლებლო, და ხელოვნების ნიმუშთა გატანა-შემოტანის სამსახურებთან ერთად განთავსებულია უნიკალური არქივი. დარჩენილი 120 თანამშრომელი კი 2016 წლიდან საოფისე ფართს კრწანისის ქუჩაზე ქირაობს.

"ჩვენ ამ საიჯარო ხელშეკრულების თანხას ჩვენი კომერციული შემოსავლებიდან ვიხდით, რომელიც სამუზეუმო საქმიდან სააგენტოს მუდმივად აქვს. ეს შემოსავლები წლიდან-წლამდე მზარდია. გეტყვით, რომ 2014 წლიდან ეს შემოსავლები წლიური 400 ათასი ლარიდან 3 მილიონ 700 ათას ლარამდე გაიზარდა", — ამბობს ბექა ბარამიძე.

სააგენტო განმარტავს, რომ მიმდინარე წელს მთავრობასთან შეთანხმებით დაგეგმილია სააგენტოსთვის სათანადო ფართის მქონე შენობა ნაგებობის საკუთრებაში გადაცემა. ფართის მოწყობის შემდეგ კი სააგენტოს ცენტრალური ოფისი აღნიშნულ შენობაში გადაინაცვლებს.