საქართველოს საგარეო საქმეთა მინისტრის, დავით ზალკალიანის შეფასებით უკრაინის ხელისუფლების, მათ შორის პარლამენტის წარმომადგენლებმა "ძალიან არამეგობრული განცხადებები გააკეთეს", ქართველი ელჩის გამოძახებს შემდეგ. ამის შესახებ ზალკალიანმა დღეს, 27 მაისს პარლამენტში ჟურნალისტებთან ისაუბრა:

"ჩვენ მოვისმინეთ ძალიან არამეგობრული განცხადებები უკრაინის ხელისუფლების სხვადასხვა წარმომადგენლობის მხრიდან, მათ შორის, პარლამენტიდან. მათ თქვეს რომ "საქართველო მათთვის არაფერია", რომ "საქართველო გადახარშავს ამას",

ვფიქრობ, ის განცხადებები, რომლებიც გაკეთდა, ჩვენი გადაწყვეტილების შესაბამისად, არ იყო მეგობრული. როდესაც სტრატეგიულ პარნიორობაზეა საუბარი, მათ ერთმანეთს უნდა გაუგონ, პირველ რიგში, ყველა მნშვნელოვან საკითხზე".

დავით ზალკალიანის განცხადებითვე უკრაინაში საქართველოს ელჩის დაბრუნება არ გაიწლება.

"თარიღს, როდის დაბრუნდება, ჩვენ განვსაზღვრავთ და მე მგონია, დიდხანს არ გაიწელება პროცესი", — განაცხადა მინისტრმა.

საქართველოს მთავრობამ უკრაინიდან კონსულტაციებისთვის ელჩის, თეიმურაზ შარაშენიძის გამოწვევა მას შემდეგ გადაწყვიტა, რაც პრეზიდენტ ვოლოდიმირ ზელენსკიმ საქართველოს ყოფილი პრეზიდენტი, მიხეილ სააკაშვილის რეფორმების საბჭოს ხელმძღვანელად დანიშნა.