რამდენიმე დღის წინ კრისტოფერ ნოლანის ფილმის Tenet ახალი ტრეილერი გავრცელდა და მაყურებელი მაშინვე დარწმუნდა, რომ, როგორც ამ რეჟისორის შემოქმედებას შეეფერება, მომავალ ფილმშიც შთამბეჭდავი სანახაობის ხილვასთან ერთად სიუჟეტთან დაკავშირებით მრავალი კითხვა გაგვიჩნდება.

"დროის შებრუნება" — მსგავსი ტერმინი გაჟღერდა ტრეილერში, რომელმაც ყველაზე მეტი კითხვა გამოიწვია, თუმცა, როგორც ჩანს, თავად მსახიობებსაც გაუჭირდათ, რომ ფილმში მოთხრობილ ისტორიაში ბოლომდე გარკვეულიყვნენ.

"ყოველდღე ვაწუხებდი ნოლანს კითხვებით, თუმცა ის ძალიან თავაზიანი იყო და პასუხს ყოველთვის მშვიდად და მოთმინებით მცემდა. ეს ძალიან მნიშვნელოვანი იყო, რათა მსახიობები ისტორიას სწორად მიჰყოლოდნენ და თავიანთი მაქსიმუმი გაეკეთებინათ იდეის განსახორციელებლად. ამიტომაც ის მოთმინებით ეკიდებოდა ჩვენს კითხვებს და ძალიან თავაზიანად გვეპყრობოდა", — განაცხადა ჯონ დევიდ ვაშინგტონმა, რომელიც ფილმში მთავარ როლს ასრულებს.

რაც შეეხება რობერტ პატინსონს, რომელიც ასევე თამაშობს კრისტოფერ ნოლანის ახალ ფილმში, GQ-სთან მიცემულ ინტერვიუში აღნიშნა, რომ ფილმის ბოლომდე გაგება მასაც გაუჭირდა, თუმცა თავად რეჟისორის განცხადებით, პატინსონთან მუშაობა საინტერესო და ნაყოფიერი იყო:

"მას კარგად ესმოდა ჩემი, რადგან სცენარი მთლიანად გაიგო. მაგრამ იმისათვის, რომ Tenet-ის სცენარი გაიგო, აუცილებელია მაყურებლის თვალით შეხედო და ისე განსაჯო. პატინსონმა კი ამას კარგად გაართვა თავი", — ამბობს ნოლანი.

კრისტოფერ ნოლანი და ჯონ დევიდ ვაშინგტონი გადასაღებ მოედანზე.

ფოტო: Warner Bros

რეჟისორმა ფილმის იდეაზეც ისაუბრა:

"ეს არის ძალიან ამბიციური და დიდი მასშტაბის ფილმი, რომელიც ჯაშუშებზე გადაღებული ფილმების ჟანრს სრულიად ახალ სახეს აძლევს და ცდილობს, რომ მაყურებელი იქ ამოგზაუროს, სადაც მანამდე არ ყოფილან და ამას არც კი ელოდნენ".

შეგახსენებთ, რომ Tenet-ის პრემიერა 17 ივლისსაა დაგეგმილი და ის ერთ-ერთი პირველი დიდი ჰოლივუდური პროექტი იქნება, რომელის ხილვაც პანდემიის შემდეგ მაყურებელს კინოთეატრებში შეეძლებათ.