ეკონომიკური საქმიანობების ნაწილი დაგეგმილზე ადრე იხსნება. დღეს, 27 მაისის ბრიფინგზე, პრემიერმა გიორგი გახარიამ ჩამოთვალა ის სფეროები, რაც უახლოს დღეებში განაახლებს მუშაობას, მათ შორის:

  • 29 მაისიდან — ყველა სახის მუნიციპალური ტრანსპორტი, მათ შორის, მეტრო (აუცილებელია პირბადის ტარება მგზავრობისას);
  • პირველი ივნისიდან — ყველა სახის ღია მაღაზია, მათ შორის, სავაჭრო მოლები, ღია და დახურული ყველა სახის ბაზრობა და მხოლოდ ღია სივრცის მქონე რესტორნები;
  • 8 ივნისიდან — ყველა სახის მომსახურეობა რესტორნებში;
  • 8 ივნისიდან — სასტუმროები, რომლებსაც გავლილი აქვთ ჯანდაცვის სამინისტროს შემოწმება;
  • 8 ივნისიდან — საქალაქთაშორისო ტრანსპორტი.

პრემიერმა, ასევე, აღნიშნა ისიც, რომ საქართველოში კორონავირუსი არ დამარცხებულა და აუცილებელია, გაგრძელდეს უსაფრთხოების ნორმების დაცვა.

შეზღუდვების შემსუბუქების მიზეზად გიორგი გახარიამ განაცხადა, რომ საქართველოში "ვირუსის გავრცელება კონტროლს ექვემდებარება". მისი თქმით, ამას მოწმობს ის, რომ 27 მაისს მხოლოდ 3 ახალი შემთხვევა გამოვლინდა, ისიც საკარანტინე სივრციდან:

"დღეს ინფიცირებულების რაოდენობის სამი ახალი შემთხვევაა და სამივე არის საკარანტინე სივრციდან. ფაქტობრივად, შეგვიძლია თქვათ, რომ ვირუსის გავრცელება ექვემდებარება კონტროლს. ამის დასტურად შეგვიძლია გამოვიყენოთ რამდენიმე ფაქტი. პირველი: ინფიცირებულების ახალი შემთხვევები მომდინარეობს საკარანტინე ზონებიდან; მეორე: ინფიცირებულების ახალი შემთხვევები გვაქვს ჩვენთვის ცნობილი კლასტერებიდან და მესამე: რისკის შემცველი ჯგუფია საერთაშორისო გადაზიდვები, რეზეც აქტიურად მუშაობს საკოორდინაციო საბჭოს შტაბი და აქ კონტროლი არის გამკაცრებული".

საგანგებო მდგომარეობის დასრულების შემდეგ რიგი შეზღუდვები კვლავ ძალაში დარჩა. დახურულ საჯარო სივრცეში სავალდებულოა პირბადეების ტარება, მათ შორის სავაჭრო ობიექტებში. ასევე, სავალდებულოა სოციალური დისტანციის დაცვაც. ამასთან შეზღუდულია ტაქსებით სამზე მეტი პირის გადაადგილება და მძღოლები ვალდებული არიან პირბადეები ატარონ.