მსოფლიოს სახელმწიფოები საქართველოს დამოუკიდებლობის დღეს ულოცავენ. მათ შორისაა: უკრაინა, ალბანეთი, აზერბაიჯანი, ლატვია და მოლდოვა.

"ჩვენი გულწრფელი მილოცვა საქართველოს მეგობრულ ხალხს, დამოუკიდებლობის დღესთან დაკავშირებით! მშვიდობის, კეთილდღეობისა და წარმატების საუკეთესო სურვილებით", — წერს უკრაინის საგარეო საქმეთა სამინისტრო Twitter-ზე.

Twitter-ის მეშვეობით მიულოცა საქართველოს დამოუკიდებლობის დღე ალბანეთმაც.

"ჩვენ გულწრფელად ვულოცავთ საქართველოს ხალხს და ჩვენს კოლეგებს საქართველოს საგარეო საქმეთა სამინისტროში, რომლებიც ეროვნულ დღეს აღნიშნავენ. გილოცავთ დამოუკიდებლობის დღეს, საქართველო!" — წერს ალბანეთის ევროპისა და საგარეო საქმეთა სამინისტრო.

სოციალური ქსელით ულოცავს საქართველოს აზერბაიჯანის საგარეო საქმეთა სამინისტროც.

"საუკეთესო სურვილები და გულწრფელი მილოცვა მეგობრულ საქართველოს დამოუკიდებლობის დღესთან დაკავშირებით. საქართველოს მეგობრულ ხალხს ძლიერ ჯანმრთელობას, წარმატებებსა და მარადიულ კეთილდღეობას ვუსურვებთ", — ნათქვამია აზერბაიჯანის რესპუბლიკის საგარეო საქმეთა სამინისტროს ოფიციალურ Twitter-ის გვერდზე.

დამოუკიდებლობის დღესთან დაკავშირებით საქართველოს კეთილდღეობა უსურვა ლატვიის საგარეო უწყებამაც.

"ყველაზე გულწრფელი მილოცვა საქართველოს ხალხს, რომელიც საქართველოს დამოუკიდებლობის დღეს აღნიშნავს! ჩვენს მეგობრებს მშვიდობას, უსაფრთხოებას და კეთილდღეობას ვუსურვებთ!" — წერს ლატვიის საგარეო საქმეთა სამინისტრო.

საქართველოს სუვერენუტეტის მხარდაჭერა გამოხატა პირადად ლატვიის საგარეო საქმეთა მინისტრმაც.

"ძალიან თბილი მილოცვა ჩვენს ქართველ მეგობრებს, რომლებიც დამოუკიდებლობის დღეს აღნიშნავენ! ლატვია მტკიცედ უჭერს მხარს საქართველოს სუვერენიტეტს და ტერიტორიულ მთლიანობას, ასევე ევროპულ და ევროატლანტიკურ მისწრაფებებს", — წერს ლატვიის საგარეო საქმეთა მინისტრი პირადი Twitte-ის გვერდზე.

საქართველოს წინსწვლას უსურვებს მოლდოვაც.

"გილოცავთ დამოუკიდებლობის დღეს, საქართველო! დაე, ამ დღემ ჩვენს ქართველ მეგობრებს კეთილდღეობა, წინსვლა და ბედნიერება მოუტანოს!" — წერს მოლდოვას საგარეო და ევროპული ინტეგრაციის მინისტრი პირადი Twitter-ის გვერდზე.

დღეს, 26 მაისს საქართველო დამოუკიდებლობის 102-ე წლისთავს აღნიშნავს.