სახლში გატარებული დრო ჩვენ გარშემო ადამიანების ერთმა ნაწილმა ნაყოფიერად გამოიყენა, მეორე ნაწილმა კი, მოდი, გულწრფელად ვთქვათ, უბრალოდ კარგად გამოიძინა და ყველა სერიალს უყურა (როგორც მოგვიანებით აღმოაჩენთ, სტატიის ავტორი ადამიანთა ამ მეორე ჯგუფს მიეკუთვნება).

თუმცა, არც ერთი გამოცდილება არ ქრება უკვალოდ და ჩვენც გადავწყვიტეთ, შეგვეჯამებინა, რა ცხოვრებისეული ცოდნა შეგვძინა კორონავირუსის გამო სახლში გამოკეტვამ:

1. უზომოდ მნიშვნელოვანია თუნდაც პატარა ეზო ან მოზრდილი აივანი

თვითიზოლაციაში გატარებულმა დღეებმა დაგვანახა, რომ მნიშვნელოვანია, სახლშიც გვქონდეს "გარეთ" ყოფნის საშუალება. ნამდვილად არ იქნება გასაკვირი, თუ უაივნო ბინები წარსულს ჩაბარდება, კერძო სახლებზე კი მოთხოვნა გაიზრდება.

2. რომ ჭურჭლის სარეცხი მანქანა სწორი ინვესტიცია იყო

რამდენჯერ უთქვამთ თქვენთვის, რომ ჭურჭლის სარეცხი მანქანა საჭირო არაა, თუ დიდ ოჯახში არ ცხოვრობ?! როგორც ჩანს, გვატყუებდნენ, ან ზუსტად არ იცოდნენ, რამდენი ჭუჭყიანი თეფშის წარმოება შეუძლია ერთ სრულ დღეში ადამიანს.

3. ერთი კვირის დაუვარცხნელ თმას 10 წუთი მაინც სჭირდება დასავარცხნად, ასე რომ, ვიდეოზარის წინ ეს ფაქტორიც გასათვალისწინებელია

თუ არ გამოგიცდიათ, ვერასდროს მიხვდებით, როგორი პანიკის გამოწვევა შეუძლია ფრაზას "5 წუთში რომ დაგირეკო ზუმში?"

4. ერთი და იგივე ჯინსი სადღაც 6 კილოს მომატების შესაძლებლობას იძლევა

ცოტაც გაუძელით, ჯინსებო და ამასობაში ტანსაცმლის მაღაზიაც გაიხსნება.

5. კვერცხის შეწვის 2 მეთოდი არსებობს, დანარჩენი ყველაფერი მაიმუნობააა

ათქვეფილი და "მზესავით". გააჩნია, რამდენი ჭურჭლის დასვრისთვის ხარ მზად.

6. საწოლიდან მუშაობა მაქსიმუმ 2 საათამდეა სახალისო

თურმე იმიტომ მოგვიგონებია სკამები, რომ დაწოლილზე მუშაობა დიდხანს უბრალოდ შეუძლებელია.

7. Youtube-ზე საბავშვო ვიდეოები და ანიმაციები უფრო და უფრო უარესი ხდება

Youtube-ის საბავშვო მხარე დიდად შემეცნებითი და ხარისხიანი ნამდვილად არაა.

8. მასწავლებლებს მეტი ხელფასი უნდა ჰქონდეთ

სახლში ბავშვების მეცადინეობამ და მასწავლებლების შრომაზე დაკვირვებამ უფრო ცხადი გახადა, რამდენ რამეს აკეთებენ მასწავლებლები მიზერული ხელფასების სანაცვლოდ.

9. თითქმის 3-თვიანი თვითიზოლაცია საკმარისია იმისთვის, რომ კაცებმაც ისწავლონ სარეცხი მანქანის რეჟიმები

სპოილერი: 10 რეჟიმიდან მხოლოდ 2 არის საჭირო.

10. არსებობს პირბადე, რომელიც გიცავს და არსებობს "მაღაზიაში შესასვლელი პირბადე", რომელიც ყველაზე ბინძური რამაა მსოფლიოში

რომელ პირბადეზე ვამბობთ, ხომ იცით? აი ჩანთის სიღრმეში რომ არის ჩაკუჭული და მხოლოდ მაღაზიაში შესვლის წინ იკეთებ, მერე კი უკან, წყვდიადში აბრუნებ...

11. ბუნებრივი საფუარის გამოზრდა და გამოკვება დაახლოებით შინაურ ცხოველზე ზრუნვასავით სახალისოა

პურის მცხობელებს თუ დავუჯერებთ, ბუნებრივი საფუარი საკუთარ სახელზეც კი რეაგირებს.

12. სკაიპმა როგორღაც მოახერხა და რისთვისაც იყო შექმნილი, ის მომენტი გამოტოვა

მოხერხება ხომ უნდა?!

13. მნიშვნელოვანია, რამის მართვა მაინც იცოდე, საკუთარი ფეხების გარდა: მანქანის, სკუტერის, ველოსიპედის...

თუ ტაქსის აკრძალავენ, შენი მანქანით გახვალ გარეთ, თუ ამასაც აკრძალავენ, სკუტერით ან ველოსიპედით...

14. ვერაფერი, ვერც ვიდეოზარები, ვერც შორიდან ხელის დაქნევა და ვერც იდაყვებით მისალმება ვერ შეედრება ჩახუტებას

მგონი, ზუმში ორჯერ დალევის შემდეგ მთელმა სამყარომ აღიარა, რომ დიახაც, ჩახუტება ძალიან გვენატრება და ამას ვერაფერი შეცვლის.