დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

ჯანდაცვის მინისტრის, ეკატერინე ტიკარაძის თქმით, ქვეყანაში საზოგადოებრივი ტრანსპორტის ამუშავება ჯერ არ იგეგმება. მინისტრის განმარტებით, ამ მიმართულებით გარკვეული წესების დადგენაზე მუშაობენ. ამ თემაზე ტიკარაძემ მთავრობის ბრიფინგზე ისაუბრა.

"ტრანსპორტის ამოქმედებასთან დაკავშირებით ჩვენ ჯერ არ მიგვიღია დადებითი გადაწყვეტილება, ვინაიდან მნიშვნელოვანია ის სტატისტიკური მონაცემები და ეპიდსიტუაცია, რომელიც დღეს ჯერ კიდევ რჩება ქვეყანაში. რეალურ დროში ინფექციის გავრცელების მაჩვენებელი არის 1,36, რაც ვერ გვაძლევს საფუძველს, მივცეთ მთავრობას რეკომენდაცია გარკვეული შეზღუდვების მოხსნასთან დაკავშირებით", — თქვა ეკატერინე ტიკარაძემ.

მინისტრის განცხადებით, ინფექციის გავრცელების კოეფიციენტს დააკვირდებიან, რის შემდეგაც მიიღებენ გადაწყვეტილებას დამატებით შეზღუდვების მოხსნაზე.

მთავრობის გადაწყვეტილებით, ხვალ 23 მაისიდან მანქანაში 3 ადამიანზე მეტის ყოფნის აკრძალვა მოიხსნება და ის მხოლოდ ტაქსის შემთხვევაში იქნება სავალდებულო. მინისტრის განმარტებით, ტაქსების შემთხვევაში შეზღუდვა დარჩა, რადგან ისინი მგზავრებს ხშირად იცვლიან და დაავადების გავრცელების გარკვეული რისკი არსებობს.

სულ საქართველოში კორონავირუსით ინფიცირების 723 შემთხვევაა გამოვლენილი, მათგან გამოჯანმრთელებულია 495 ადამიანი, ხოლო გარდაცვლილია — 12. კარანტინის რეჟიმში 3 614 პირი რჩება, სტაციონარში მეთვალყურეობის ქვეშ კი — 316.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: