"ოპოზიციის კრიტიკას არ ჰქონდა არანაირი საფუძველი და უსაფუძვლო კრიტიკის საფუძველზე ჩვენ ვერ ვიმოქმედებდით", — ასე უპასუხა ქართული ოცნების დეპუტატმა, ირაკლი კობახიძემ კითხვას შეზღუდვების შესახებ კანონში ახალ დათქმასთან დაკავშირებით.

"ამას აქვს თავისი დროებითი დატვირთვა, ჩვენ გვჭირდება ივლისის ჩათვლით შეზღუდვების მოქმედება, აქედან გამომდინარე იქნება მიღებული საკონსტიტუციო ცვლილებებიც. აქედან გამომდინარე ჩვენ ვფიქრობთ, რომ მიზანშეწონილია ივლისის კონკრეტული თარიღით შემოიფარგლოს ამ კანონის მოქმედების ვადა", — განაცხადა კობახიძემ კენჭისყრის შემდეგ

როგორც დეპუტატმა ივარაუდა, პარლამენტს შეეძლება, რომ უკვე 21 ივნისს უყაროს კენჭი საკონსტიტუციო ცვლილებებს, ხოლო 29 ივნისს მესამე მოსმენით დაასრულოს კანონპროექტის მიღება.

"ოპოზიციის კრიტიკას არ ჰქონდა არანაირი საფუძველი და უსაფუძვლო კრიტიკის საფუძველზე ჩვენ ვერ ვიმოქმედებდით და ამაზე ვერ ავაგებდით ჩვენს შემდგომ ნაბიჯებს. ამას მოითხოვდა ის მოცემულობა, რომელიც არის ჩამოყალიბებული. ისედაც ამ რეალობაში გვჭირდება ამ ნორმების მოქმედება. მაგალითად, ივლისის თვეში, როცა საკონსტიტუციო ცვლილებები მიღებული იქნება, შეგვეძლება საგანგებო მდგომარეობის აღდგენა", — განაცხადა კობახიძემ.

კობახიძის თქმით, ახალი დათქმა დისკუსიის საფუძველზე შეიმუშავეს და ინიციატივა დეპუტატ კახა კუჭავას ეკუთვნის.

დღეს, 21 მაისს საქართველოს პარლამენტმა პირველი მოსმენით მხარი დაუჭირა საკანონმდებლო ცვლილებებს, რომელიც საგანგებო მდგომარეობის გამოცხადების გარეშე შეზღუდვების დაწესებას ითვალისწინებს.

საკითხი დაჩქარებული წესით განიხილება. პირველი მოსმენა დღეს იყო, ხოლო მეორე და მესამე მოსმენა, შესაბამისად, საბოლოო კენჭისყრა ხვალ არის დაგეგმილი.

პლენარულ სხდომაზე განხილვის დასასრულს, ქართული ოცნების ერთ-ერთი ლიდერი, ირაკლი კობახიძე გამოვიდა ინიციატივით, რომ ეს შეზღუდვები იყოს დროებითი. კერძოდ, მისი განმარტებით, ეს ნორმები გარდამავალ დებულებებში გაიწერება და იქნება დროებითი, "პირობითად, 15 ივლისამდე".

"15 ივლისამდე იმედია, რომ იქნება რადიკალურად განსხვავებული ვითარება პანდემიის კუთხითაც. მანამდე საკონსტიტუციო ცვლილებებიც იქნება მიღებული და ამის შემდეგ უკვე ეს გარდამავალი დებულებები, ბუნებრივია, დაკარგავს თავის აქტუალობას", — თქვა მან.

კობახიძემ პარლამენტს შესთავაზა ეს იდეა დღესვე განიხილონ და აღნიშნა, რომ იდეა "სპონტანურია".

რამდენიმე წუთში კობახიძემ დააზუსტა, რომ იგულისხმება ივლისის რომელიმე რიცხვი და ამაზე მსჯელობაა საჭირო. კანონპროექტზე კენჭისყრა სწორედ ამ დათქმით გაიმართა.

პარლამენტში ინიცირებული კანონპროექტის მიხედვით, ხელისუფლებას გარკვეული უფლებები საგანგებო მდგომარეობის გამოცხადების გარეშე ეძლევა. მათ შორისაა მიმოსვლის, საკუთრების, სოციალური ღონისძიების მიზნით თავშეყრის შეზღუდვის შესაძლებლობაც. კანონპროექტის ავტორი ქართული ოცნების დეპუტატი დიმიტრი ხუნდაძეა. მას ორი კანონის შეცვლა სურს — კანონი საზოგადოებრივი ჯანმრთელობის შესახებ და სისხლის სამართლის საპროცესო კოდექსი.

ნახეთ ვრცლად: მიმოსვლის, თავშეყრის, საკუთრების შეზღუდვა — რა შეეძლება მთავრობას საგანგებო მდგომარეობის გარეშე