ქართული ოცნების ყოფილი წევრი, ეკა ბესელია საგანგებო მდგომარეობის გამოცხადების გარეშე შეზღუდვების დაწესების შესახებ კანონპროექტს ეხმაურება და ამბობს, რომ მსგავსი ინიციატივა 2008 წელს, საომარი მდგომარეობის პირობებშიც კი არ ყოფილა.

"2008 წლის აგვისტოს ომი როცა იყო და საომარი მდგომარეობა გამოცხადდა, მე მაშინაც არ მახსოვს, მიუხედავად იმისა, რომ იცით თქვენ ჩემი პოზიცია, ძალიან ვაკრიტიკებდი მაშინდელ მიღებულ კანონებს. აზრად არავის მოსვლია მაშინ, რომ ასეთი კანონპროექტი შემოეტანა. არსებობს რაღაც დაუწერელი წესები, ხელისუფლების დანაწილების პრინციპს პატივი სცე — ეს არის პარლამენტი, მთავრობა და სასამართლო", — აღნიშნა ბესელიამ მთავარი არხის ეთერში.

პარლამენტში ინიცირებული კანონპროექტის მიხედვით, ხელისუფლებას გარკვეული უფლებები საგანგებო მდგომარეობის გამოცხადების გარეშე ეძლევა. მათ შორისაა მიმოსვლის, საკუთრების, სოციალური ღონისძიების მიზნით თავშეყრის შეზღუდვის შესაძლებლობაც. კანონპროექტის ავტორი ქართული ოცნების დეპუტატი დიმიტრი ხუნდაძეა. მას ორი კანონის შეცვლა სურს — კანონი საზოგადოებრივი ჯანმრთელობის შესახებ და სისხლის სამართლის საპროცესო კოდექსი.