ჯანდაცვის მინისტრის მოადგილის, თამარ გაბუნიას თქმით, სრულიად დაუჯერებელია, რომ ორ სხვადასხვა დაწესებულებაში გინეკოლოგმა მოინახულა ორსული ქალი და ვერ გამოავლინა, რომ ორსულად იყო. ასე გამოეხმაურა ის ფსიქიატრიულ დაწესებულებაში იმ ქალის მშობიარობას, რომელსაც მიუხედავად გინეკოლოგის გასინჯვისა, ორსულობა ვერ დაუდგინეს.

როგოგორც გაბუნია ამბობს, აღნიშნულ შემთხვევას შეისწავლიან და რეაგირებაც შესაძლებელი იქნება.

"ყველას მოეთხოვება, რომ ჰქონდეს კონტრაქტი სპეციალისტთან, თუმცა, როგორც ჩანს, არ შედგა ამ კონკრეტულ შემთხვევაში სპეციალისტის კონსულტაცია, რადგან მართლაც სრულიად დაუჯერებელია, რომ ორ სხვადასხვა დაწესებულებაში გინეკოლოგმა მოინახულა ორსული ქალბატონი და ვერ გამოავლინა, რომ ქალბატონი იყო ორსულად უკვე გვიან ვადაზეც. ამ ფაქტს შევისწავლით და როცა გვექნება დასრულებული კვლევის შედეგები, უფრო კონკრეტული პასუხიც იქნება ამ შეკითხვაზე და რეაგირებაც მეტად კონკრეტულად იქნება შესაძლებელი", — განაცხადა გაბუნიამ.

ომბუდსმენის ანგარიშის მიხედვით, ქალმა ფსიქიატრიულ დაწესებულებაში იმშობიარა. ამის შესახებ საუბარია სახალხო დამცველის სპეციალურ ანგარიშში, რომელიც ფსიქიატრიულ და სახელმწიფო ზრუნვის დაწესებულებებში ქალთა სექსუალურ და რეპროდუქციული ჯანმრთელობის უფლებებს ეხება.

როგორც ანგარიშშია ნათქვამია, ფსიქიატრიულში პაციენტის ორსულობა ვერ დაადგინეს, მიუხედავად იმისა, რომ ის გინეკოლოგმაც გასინჯა. მედპერსონალმა ორსულობის შესახებ მხოლოდ მას შემდეგ შეიტყო, რაც ქალმა 36-37 კვირის გესტაციურ ვადაზე დაუხმარებლად დაწესებულების საპირფარეშოში იმშობიარა.

ანგარიშში განმარტებულია, რომ პაციენტი ფსიქიატრიულ დახმარებას ორსულობის განმავლობაში 2 სხვადასხვა ფსიქიატრიულ დაწესებულებაში იღებდა, თუმცა ორსულობა ვერცერთ ამ დაწესებულებაში ვერ დაუდგინეს, მიუხედავად იმისა, რომ ამ დაწესებულებებში გინეკოლოგიც ჰყავთ.