ნაციონალური მოძრაობის წევრი, სალომე სამადაშვილი ამბობს, რომ ხელისუფლება საკონსტიტუციო ცვლილებების ჩაგდებას და ამის ოპოზიციისთვის გადაბრალებას ცდილობს.

მისი თქმით, "სულელი არავინ არის" და ყველამ ძალიან კარგად იცის, რომ ქართულ ოცნებას ნებისმიერი ცვლილების გასატანად ქვეყნის საკანონმდებლო ორგანოში საკმარისზე მეტი ხმები აქვს.

"რა თქმა უნდა, ამის ნებართვას არავინ არ მისცემს ბატონ თალაკვაძეს. ჩვენი მხრიდან არაფერი შეცვლილა, რასაც ვითხოვდით, იმას ვითხოვთ — პოლიტპატიმრების გათავისუფლებას. ვფიქრობ, რომ არანაირ მოწოდებებს საერთაშორისო თანამეგობრობამ სხვა აზრი დააფიქსიროს, აზრი არ აქვს, იმიტომ რომ, ეს მოსაზრება და პოზიცია ჩვენი საერთაშორისო პარტნიორების არაერთხელ იქნა უკვე ხმამაღლა დაფიქსირებული", — განაცხადა სამადაშვილმა მთავარ ახთან.

საქართველოს პარლამენტის თავმჯდომარის, არჩილ თალაკვაძის განცხადებით, ქართული ოცნება მოწოდებულია, რომ 8 მარტის შეთანხმება შეასრულოს და თუ საკონსტიტუციო ცვლილებები ჩავარდება, ეს მხოლოდ "რადიკალური ოპოზიციის" პასუხისმგებლობა იქნება.

მანვე აღნიშნა, რომ პოლიტპატიმრების გათავისუფლების პირობა მმართველ გუნდს "არავითარი ფორმით, არავის წინაშე არ დაუდია".

8 მარტს ოპოზიციასა და მმართველ გუნდმა ახალ საარჩევნო მოდელზე შეთანხმებას ხელი მოაწერა. მხარეებს შორის გაფორმებულ მემორანდუმთან ერთად, მართლმსაჯულების სისტემაზე ოპოზიციისა და ხელისუფლების ერთობლივი განცხადებაც გამოქვეყნდა. სადაც ორივე მხარე, მიუხედავად განსხვავებული აზრისა თანხმდებიან, რომ აუცილებელია რეაგირება ქმედებებზე, რომლებიც შესაძლოა აღქმული იქნეს, როგორც სასამართლო და საარჩევნო პროცესების არასათანადო პოლიტიზაცია.

"ჩვენ ვეთანხმებით საქართველოს მართლმსაჯულების სისტემაში უმაღლესი სტანდარტების დაცვისა და მათი დახვეწისკენ სწრაფვის მნიშვნელობას. მიუხედავად განსხვავებული აზრისა, ყველანი ვთანხმდებით, რომ აუცილებელია რეაგირება ქმედებებზე, რომლებიც შესაძლოა
აღქმულ იქნეს, როგორც სასამართლო და საარჩევნო პროცესების არასათანადო პოლიტიზაცია და მომავალში მსგავსი ქმედებები თავიდან უნდა იქნეს აცილებული.

მივესალმებით პრეზიდენტის წინადადებას, მისი საკონსტიტუციო უფლებამოსილების ფარგლებში, თავისუფალი, სამართლიანი და გამჭვირვალე საარჩევნო პროცესის ხელშეწყობასთან დაკავშირებით", — წერია განცხადებაში.